Read Falam Chin JOB 39 Bible Online

JOB 39 - Falam Chin bible

JOB 39

¹Ziangtikah khaamlak zaathar in faate an nei ti na thei maw? Zukneng ih faate hrin lai na hmu dah maw?

²An faate thlaziat an pai ti na thei maw? Ziangtikah an hring ding ti na sim thei maw?

³Ziangtikah so a nu a bok ding ih a pum sungin a suah ding ih, Leilung a thlen ding ti na thei thei maw?

⁴An faate pawl cu hramlak ah an tlang ih an cakzet; Anmah ih duhnak ah an feh ih an nu hnenah an kir sal nawn lo.

⁵Hramlak laak cu zo in so duh tawkih tlan theinak thu a pek? Zoin so a thlah ih an duhnak ah a vakter?

⁶Milai umlonak nelrawn ramṭhing kha an inn ah ka pek ih, Hrampi umlonak cite hmunrawn ah ka umter.

⁷Thawmvang tamnak khawpi sungah cun an um duh lo; Zohman in hrem tahrat in hna an ṭuanter thei lo.

⁸Tlangpar cu an hrampi piatnak hmun a si; Ei dingah a hring pohpoh an hawl.

⁹Sele in na hna a lo ṭuansak duh ding maw? Na caw inn ah zankhat hman a riak duh ding maw?

¹⁰Hridai in khit tahratin lei na letter thei ding maw? Leileh cia mi rawnrual seh, tiah leirual ternak na dirter thei ding maw?

¹¹A khunghar na hna ṭuantu dingah, A cahnak na rinsan thei ding maw?

¹²Na fang ciilnak puum ah a ra kir sal ding tiah na zum maw? Na puum ah thlairawl na khawmter thei ding maw?

¹³Kalauk vate ih thlakhawn cu ziangtlukinso a zamrang? Asinain ziangvek kalauk vate khal ngathur vek cun a zuang thei lo.

¹⁴Kalauk vate in a ti cu leilung parah a taan; Leilung ih hlumter dingah!

¹⁵Mi in an pal kuai pang ding, tile ramsa khal in an ciilkuai pang ding, ti a thei lo.

¹⁶A faate pawl cu amah ih fa lo vekin a tuah; A zonzaihnak cu a lak a si ding ti a poisa lo.

¹⁷Hiti vekih a aattertu le fimnak a pe lotu cu Pathian a si.

¹⁸Sikhalsehla nasa zetih a tlan cengmang ahcun, Rang le rangtotu hman a titham lo ih a hnihsan meen a si.

¹⁹Job, rang a caktertu cu nang na si maw? A tuanghmul fualzet ih a khotertu cu nang na si maw?

²⁰Kharbok vekih an khir hi nang in maw na khirter? Mi an hro ih an hnar an phiit khi nang in maw na phiitter?

²¹Thatho zetin phairawn ah an ke an tiim; Raldonak hmunah an tha neih tawp in an nor.

²²Ṭih khal an nei loih ziangvek ralnam hman in a khir thei lo.

²³Rangtotu ih an kenmi hriamnam: Conkiang bawm, feipi le nam pawl an khawng-aw ih nisa ah an tle zohzo.

²⁴Raldonak tawtawrawt an tum cun daitein an um thei nawn lo; An tha a tho ih hmaiah an tlan vurvo.

²⁵Tawtawrawt an tumtin in an hnar an phiit; Raldonak rim lamhlat in an thei, Ralkap hotu bawi ih thupeknak aw khal an thei.

²⁶Khaute cu na hnen in mawsi zuan a zir? Thlanglam zuan ding ih a thla a pharh tikah khan?

²⁷Muvanlai in na thu a ngai mawsi? Tlangsang parih bu a sak tikah?

²⁸Lungkham saangbikah bu a tuah ih Lunghriam le lungzum pawl a ralhruang ah a hmang.

²⁹Cutawk ihsin thah ding le ei ding kha, A hlat a nai ah a thlir ciamco.

³⁰Saruak umnak ah langta an khawm aw, A thii cu an fano pawl in an dawk.