Read Falam Chin JOB 4 Bible Online

JOB 4 - Falam Chin bible

JOB 4

¹Job, kei ṭong ve ningla na hua pei maw? Daite cun ka um thei nawn lo.

³Nangmah in mi tampi na zirh zo, baan thacak lo pawl an baan tha na cakter.

⁴Mi an baang ih an sawn an rilh rero tikah, Na ṭong fangkhat cu an dinsalnak a si ṭheu.

⁵Atu na hrangih harsatnak tikcu a ra thlen ve tikah, na ning a hang ih na thin a nau.

⁶Na Pathian biak hi na hnangamnak a si lo maw? Mithiang na si ruangah beiseinak ziangtal na nei lo maw?

⁷Ṭhatein ruat hnik! Miding mi siatsuahnak an tong, ti na thei dah maw? Mawh nei lo mi hlohralnak an tong, ti na thei dah maw?

⁸Mi tampi in ṭhatlonak cu lo bangin an thlo ih, Siatnak cu thlaici bangin an tuh, ti ka hmu zo. Ṭhatlonak le siatnak cu rawl bangin an khawm ve ko.

⁹An parah Pathian a thin a hengih thlisia bangin a siatsuah a si.

¹⁰Miṭha lo pawl cu kiosa bangin an kio an huuk, Asinain Pathian in a vuakdai hai ih an ha pawl tla a khiak ṭheh.

¹¹Deh ding le ei ding neilo kiosa bangin an thi, An faate pawl cu an ṭhekdarh aw ṭheh.

¹²Voikhat cu ka hnenah a thupte in thu a ra thleng; Dimte in a rat ruangah ka thei thei ceu a si.

¹³It that thei loih i tuahtu zan mangsia bangtuk a si.

¹⁴Ka thin a phang ih ka thir, Ka pumpuluk in ka khur.

¹⁵Thlarau in ka hmai thli bangin i hun seem, Ka hmul a tho surso.

¹⁶Cuih thlarau cu ka hmaiah a ding ka hmu; Ka zoh rero naón ziang a si ti ka hliah thei lo. Cule a dai zirziar mi sung ihsin aw ka thei:

¹⁷“Pathian hmaiah miding an um thei ngai pei maw? Siamtu hmaiah minung zotal a thianghlim thei pei maw?

¹⁸Pathian cun a palai pawl hman a zum thei lo; A vancungmi pawl lak hmanah palhnak a hmu.

¹⁹Cuti a si ahcun tlak ih tuah mi milai hi, Leivut ihsin seemsuah mi, phehlep vekih olte ih rialdip thei mi milai cu a rinsan dingah na zum maw?

²⁰Milai cu zinglam ah a nung ko, Asinain zanlam ah zohman ih theih loin a thi ziar thei a si.

²¹A neih ciami hmuahhmuah cu lon ṭheh a si; Fimnak tlasam in a thi.