Read Falam Chin JOB 40 Bible Online

JOB 40 - Falam Chin bible

JOB 40

¹Job, Ziangkimtithei Pathian cu na engtai a si, Dung na siip ding maw, a thu na let ding so?

³Aatthlakza in ka ṭong zo, BAWIPA, Kei in ziangso ka lo leh thei ding? Zianghman ka ṭong nawn lo ding.

⁵Ka ṭong dingzat hnakih tam ka ṭong zo.

⁶Cule BAWIPA in phusiing sungin Job hnenah hiti in a let:

⁷Job, pacang bangin ding awla, Ka thusuhmi pawl i let hnik.

⁸A ding lo ah i tuah tum mawsi? Kei hi misual ah re tahratin, Nang sawn a dikmi ah na ruat-aw tum mawsi?

⁹Nang, keimah tlukin na cak maw? Na aw teh keimah ih aw khawri vekin a ring maw?

¹⁰Cuti asile hminthannak le hmaihngalnak na neih mi thawn ding aw; Sunlawinak le huham na neih mi thawn thuam aw.

¹¹Mi puarthau pawl zoh hai aw; Na thinhengnak suah nasa awla an ningzak koin tuahhnik.

¹²Asi, zoh awla ṭhum hai hnik aw; Miṭha lo pawl cu an dinnak hmunah ciil ciammam aw.

¹³Leilung sungah phum ṭheh aw; Mithi ramah hreng hai aw.

¹⁴Cutiin na tuah thei asile A lo thangṭhat hmaisa biktu cu Keimah ka si ding. Nangmah in i neh a si, ka ti ding.

¹⁵Sahrang Behemoth[17] khi zohhnik; Nangmah ka lo tuah vekin anih khal ka tuah. Cawcang bangin hrampi a piat.

¹⁶Asinain ziangtluk thazaang cak so a ruangpi ah a um? Ziangvek cahnak so a taksa ah a um?

¹⁷A mei cu sidar thingkung bangin a khoh, A kawng tha tla a cak ngaingai.

¹⁸A ruh cu dar bangin a khoh, A ke tla cu thir tluan a bang.

¹⁹Ka sersiammi hmuahhmuah lakah mangbangza bik ramsa a si; Amah nehtu cu amah siamtu lawng a um.

²⁰Sahrang an tlannak tlangsaang ah, A rawl ding hrampi a kho.

²¹Hlingkung hnuai ah a bok; Cirhduup ih phaipheng lakah a relh.

²²Tivakap ih hlingkung le partiam kung in daihnem an pek.

²³Tilian hman a ṭih lo; Jordan tisuar in a hmai deeng rero hmansehla daitein a um meen.

²⁴Zoin so a mit hup tahratin a kai thei ding? Zoin so a hnar ihsin sio in a awk thei ding?