Read Falam Chin JOB 42 Bible Online

JOB 42 - Falam Chin bible

JOB 42

¹Cule Job in BAWIPA cu hiti in a let:

²BAWIPA, nang cu ziangtinkim titheitu na si, Na duhmi hmuahhmuah cu na tuah thei ti ka thei.

³‘Zianghman theilopi in ka fimnak na zo ihnit ngam mawsi?’ tiah i sut. Asi, ka theih lomi thu tampi ka ṭong, Ka theih ban lomi mangbangza thu ka rel.

⁴‘Ka ṭongmi ngai awla ka thusuh mi i let aw?’ tiah i ti.

⁵Culai ahcun ka hna lawngin ka lo thei; Atu-ah cun ka mit rori in ka lo hmu zo.

⁶Curuangah ningzak in ka fih aw ih, Leivut le vutcam lakah to in ka siir-aw a si.

⁷BAWIPA in hi hmuahhmuah Job hnenih a ṭong hnuah Elifas hnenah, “Nangmah le na rualpi pahnih parah ka thin a heng, ziangahtile ka siahhlawh Job cun ka thuhla hi dik zetin a sim naón nannih cun nan sim lo.

⁸Curuangah Job hnenah cawcang pasarih le tuucang pasarih in hei keng uhla nan hrangah thawinak va pe uh. Job in nan hrangah thla a cam ding ih a thlacamnak cu ka ngai ding ih nan aat tluk in mual ka lo photer lo ding. Amah vekin ka thuhla dik zetin nan sim lo a si,” a ti.

⁹BAWIPA ih a fial vekin Elifas, Bildad le Zofar cun an tuah ih Bawipa in Job ih thlacamnak cu a thei.

¹⁰Cule Job in a rualpi pathum hrangih thla a cam hnuah, Bawipa in amah cu a tungding sal ih a hlanih a neihmi hmuahhmuah ih lethnih tam in a pek.

¹¹A unau pawl a farnu pawl le a rualpi hlun pawl an ra leng ih a inn ah rawl ei puai an tuah. Pathian in a parah harsatnak a thlenter ruangah an zaangfahnak le an hnemnak thu an sim. Tangka le sui zunghruk pakhat fingfing an pek.

¹²BAWIPA in Job cu a netsan ah a hlan hnakih tam sinsin in thlawsuah a pek. Job in tuu thawng hleili, kalauk thawng ruk, cawcang khuah thawng khat le laak thawng khat a nei.

¹³Fapa pasarih le fanu pathum a nei.

¹⁴A fanu upa bik cu Jemimah a ti ih a pahnihnak cu Keziah a ti ih a nauta bik cu Keren Happuk a ti.

¹⁵Job fanu pawl vekih a mawimi leilung tlunah nunau zohman an um lo. An pa in a fapa pawl ro a zem vekin a fanu pawl khal a zem ve a si.

¹⁶Cuih hnuah Job cu kum za le sawmli a nung ih a tu le a fa pawl sanli tiang a hmu hai a si.

¹⁷Kum tamzet a nung ih tarkuun in a thi.