Read Falam Chin JOB 6 Bible Online

JOB 6 - Falam Chin bible

JOB 6

¹Ka tuarnak le riahsiatnak hi Cuaithlainak ah a khing thlai sisehla,

³Tifinriat ih vunnel hnakin an rit sawn ding. Ka ṭong hraang in lo mangbangter hlah seh.

⁴Cungnungbik Pathian ih conkiang in ka sungah i kalh; A tur cu ka taksa pumpi ah a zai. Pathian in ṭihnungza thil pawl ka hmaiah a song.

⁵Laak cu hrampi a piat tikah a lung a kim ko; Caw khal daitein hrampi ro a ei.

⁶Asinain thawtnak neilo, ci phulh lo rawl cu zoso a ei thei ding? Arti hawng in ziang thawtnak so a neih?

⁷Cubangtuk rawl ei ding cu ka hiar hrimhrim lo; Ka ei mi hmuahhmuah cu ka ning seksek thluh.

⁸Ziangah so ka dilmi cu Pathian in i pek lo ding? Ziangah so ka thlacamnak cu i leh lo ding?

⁹Pathian in dip seksek in i rial sehla, A kut suah in i cemter sawn sehla ka va duh so!

¹⁰I that ding ti thei ningla lungawi in ka khir ding, Ziangtluk ih ka tuar hmanah! Pathian cu a thianghlim, ka thei. A thupekmi cu ziangtik hmanah ka el dah lo.

¹¹Nung hrih dingah ziang bangtuk thazaang so ka neih lai? Beiseinak zianghman nei loin ziangah so ka nun duh rero?

¹²Lungto ih tuahmi maw ka si? Ka ruangpi hi dar maw a si?

¹³Hum-aw thei dingin thazaang ka nei nawn lo; Bomnak duh ah pan ding ka nei fawn lo.

¹⁴Atu vekih zonzaih caan ahcun, Pathian ka dungtun ah siseh, dungtun lo ah siseh, rinsantlak rualpi ka ṭul a si.

¹⁵Sikhalsehla nannih ka rualpi pawl cu, Ruah a sur lo tikih a caar mi tiva bangin i phiartu nan si.

¹⁶Cuih tiva pawl cu vur le tikhal in an khat naón,

¹⁷Ni a sat tikah an zup ṭheh, a tawne tiangin a kang thluh.

¹⁸Rannung thawn khualtlawng mi lamzin an hlo, Tidai hawl in an vak ih nelrawn ah an thi.

¹⁹Sheba le Tema[8] khua ihsin ṭilva ruun thawn khualtlawng mi pawl tla in an hawl.

²⁰Asinain a caar mi tiva kapah an ruahsannak a cem.

²¹Nannih tla cu ka hrangah cun cuih tiva vek nan si. Ka sizia in hmu tikah nan mang a bang ih in ṭih.

²²Laksawng i ra pe uh ka lo ti maw si? Ka ai ah mi pakhatkhat nawhthuh pek ka lo fial maw si?

²³Culole ka raal le zaangfah nei lo mihremtu kut in i ra hum uh, ka lo ti maw si?

²⁴Asile i zirh hnik hmeen uh! Ka sualnak i sim hnik uh! Ṭong loin daitein ka um ding ih ka lo ngaihnik hai ding.

²⁵Ṭong tluangtlam cu lung a lut, Asinain nan ṭong mi pawl cu thulolak lawng a si.

²⁶Ka ṭong mi hi thli meen a si tiah nan ruat! Asile ziangah so ka thinpihnak ṭongkam pawl cu in leh duh rero?

²⁷Ngakṭah farah nauta pawl cu camcawhfung zuknak ah nan hmang ih, Nan rualpi ṭha bik nekrawk ih nanmah lian ding nan tum.

²⁸Ka mithmai i zohhnik uh! Thuphan ka per lo ding.

²⁹Nan luan tuk zo! Mi namnuai nawn hlah uh! I hnong hlah uh! Ka thu cu a dik a si.

³⁰Asinain thuphan per rero ah in ruat; A dik le dik lo thleidang thiam lo ah in ruat.