Read Falam Chin JOB 7 Bible Online

JOB 7 - Falam Chin bible

JOB 7

¹Milai nunnak hi hranhram ih ṭuantermi ralkap nunnak bangtuk, Hnaṭuan khung lawng a ṭuantu ih nunnak bangtuk le,

²Thinghnuai daihnem lawnglawng a ngaitu sal ih nunnak vek le, A hlawhman a hngak ringringtu siahhlawh pa bangtuk a si.

³Thlakhat hnu thlakhat nun san zianghman ka nei lo; Zankhat hnu zankhat riahsiatnak lawng i pe vivo.

⁴Itthat dingih ka zau tikah tikcu a sau cuang; Zanvarte ka lawng ka taal ih khuafing cah ding lawng ka hngak.

⁵Ka taksa cu tholung in a khat, Ka vun an puar ih an kek sal, Ka hma in hnai an dok thluahthlo!

⁶Ka nunnak ni cu ruahsannak um loin an liam vivo; Thiamtaktu ih thiamhrolh hnakin zamrang sawn in an liam.

⁷Maw Pathian, ka nunnak cu thaw lawng a si hi thei ringring aw; Ka lungawinak cu a cem zo.

⁸Atu-ahcun i hmu, a sinan i hmu sal nawn lo ding. I hawl khalle ka um nawn lo ding.

⁹Mero a kiang ih a hlohta bangin, Milai cu a thi, a kirsal nawn lo.

¹⁰A inn a pan sal thei nawn lo ih, A theitu khalin an hngilh thluh zo.

¹¹Atu cu daiteón ka umthei nawn lo! Ka thinheng in ka ṭong suak ding, Ka lung a sia, ka dai nawn lo ding.

¹²Ziangah so i kil ringring? Tipi sungih rulpi ah maw i ruah? Tifinriat rulhrengah maw i ruah?

¹³Ka zau ih ihkhun ah colh ka tum, Ka tuarmi hi deem deuh thei pang sehla ka ti.

¹⁴Asinain nangmah hrimhrim in mangsia in ka tuk i sumter! Hmuhnak a phunphun i hmuh ih ka thin i phangter.

¹⁵Hiti vekin harfualfo ih nun cuahco hnak cun, Ka hngawng ih deek tahrat in thih ka duh sawn.

¹⁶Ka thin a pit! Nun ka zuam nawn lo. Keimah lawngte in i taan aw, Nun man ka nei lo.

¹⁷Milai hi ziangso a si ih hitluk lawmmam in na thupitter? Amah cu ziangruangah so na seherh ringring?

¹⁸Zingtinte na veh ih tu le tu na hniksak ringring hi!

¹⁹Ka cil ka lem caan sungte tal khawdang na hoi lo ding maw?

²⁰Nang, milai thinlung zohhliahtu, Ka sualnak in a lo tuahmawh mawsi? Na hmuibahmi ah ziangah so i tuah? Kei hi na hrang thilrit maw ka si?

²¹Ka sualnak cu i ngaithiam thei dah lo maw? Ka mawhnak cu i ngaidam thei hrimhrim lo maw? Reilote ah thlaansung ah ka it ding; I ra hawl hman cila ka um nawn lo ding.