Read Falam Chin SAAM HLABU 101 Bible Online

SAAM HLABU 101 - Falam Chin bible

SAAM HLABU 101

¹[86] Rintlaknak le dingthluk lairel- nak thu cu hla in ka sak ding. Maw BAWIPA, na hnenah ka sak ding.

²Soiselnak um lo nuncan ka zir; Ziangtikah so ka hnen na thlen thei ding? Ka inn sungah thinlung dingtein ka nung ding.

³A ṭha lomi cu ka zawi thei hrimhrim lo ding. Pathian lamzin ihsin a pialmi ih thiltuahmi cu ka hua a si. Annih thawn kan peh awknak zianghman a um lo.

⁴Zumtlak loin ka um lo ding ih, Thil ṭha lo cu a ruah hman ka ruat lo ding.

⁵A rualpi thupte in a relsiatu cu Keimah in ka siatsuah ding. Mi hngal le mi puarthau cu Ka zoh meen lo ding.

⁶Pathian rintlak ih a nungtu cu Ka mithmai ṭha an tong ding ih Ka siangpahrang inn ah ka umter hai ding. Soisel um lo pawl in ka hna an ṭuan ding.

⁷Thuphan a pertu cu ka siangpahrang inn ah a um lo ding. Mibum a hmangtu cu ka mithmai ah a leeng lo ding.

⁸Nikhat hnu ni khat kan ram sung ih mi ṭha lo pawl cu ka siatsuah hai ding. Thilsual tuahtu pawl hmuahhmuah cu BAWIPA ih khawpi sung in ka dawi thluh hai ding.