Read Falam Chin SAAM HLABU 102 Bible Online

SAAM HLABU 102 - Falam Chin bible

SAAM HLABU 102

¹[87] Maw BAWIPA, ka thlacamnak ngai awla, Bomnak dil ih ka aunak cu thei hram aw.

²Harsatnak ka ton tikah ka hnen ihsin relh aw hlah; I thei awla, ka lo kawh tikah Zamrangte in i sawn aw.

³Ka nunnak cu meikhu bangin a hlo; Ka taksa cu meisa kangh in a kaang.

⁴In vuak thlak ih hrampi bangin ka vuai. Rawl ei khal ka hiar nawn lo.

⁵Naapi in ka hruum ruangro, Ka ruh le ka vun lawng a taang.

⁶Nelrawn ih ngathur vate bangtuk ka si; ṭio sanmi khawrop ih sumbuh ka bang.

⁷Itthat thei loin ka meng; Luanglu parih vate lungleng ka bang.

⁸Sun nihlawh ka ral pawl in in hmuhsuam; Caponak ih i hmangtu pawl in Ka hmin cu mi camnak ah an hmang.

⁹Ka rawl cu vutcam a si ih, Na thinhengnak le na aithoknak ruangah,

¹⁰Ka inmi khal ka mitthli thawn a rawi aw thluh. Nangmah in i cawi ih i hlon hlo.

¹¹Ka nunnak cu zanlam ih phenthlam vek a si; Hrampi ro bangin ka si.

¹²Sikhalsehla maw BAWIPA, Nang cu kumkhua in siangpahrang na si. Sankhat hnu sankhat nang cu an lo thei ringring ding.

¹³Na tho ding ih Zion cu na zaangfah ding; Zion zaangfahnak caan ṭha cu a thleng. A thleng zo a si.

¹⁴Na siahhlawh pawl in an duh ih A lungto tiangin an ngaina. An zaangfah ih a leivut tiangin an tlaihsan.

¹⁵Miphun hmuahhmuah in BAWIPA cu an ṭih ding. Leitlun siangpahrang hmuahhmuah in a huham cu an ṭih ding.

¹⁶BAWIPA in Zion khawpi a din sal tikah, Amah ih sunlawinak cu a langter ding.

¹⁷A tlansan zomi a minung pawl ih aw cu a thei ding ih, An thlacamnak a ngai ding.

¹⁸A ra dingmi san hrangah BAWIPA ih tuahmi cu ngan siseh; A suak hrih lomi pawl khal in BAWIPA an thangṭhatnak dingah.

¹⁹BAWIPA cun a saangmi a hmun thianghlim in a vun zoh; Vancung ihsin leilung cu a vun zoh a si.

²⁰Thawngtla pawl ih aihramnak thei dingah le Thah dingih thuṭhen ciami pawl an luatnak dingah.

²¹Cuticun minung in Zion ah, BAWIPA ih hmin cu an aupi ding; Jerusalem ah an lungawinak cu a hnenah an thlenpi ding;

²²Miphun pawl le uknak pawl hmunkhat ah an ra ih, BAWIPA an biak tlang tikah.

²³Ka no lai ah BAWIPA in ka tha a ṭumter; Ka nunnak a tawiter a si.

²⁴Maw ka Pathian, atu-ah ka nunnak cu la hrih hlah aw; Ka san ṭhat laitak a si. Maw BAWIPA, nang cu kumkhua ih a nungmi na si.

²⁵Khuahlan laipi ah leilung hi na rak seemsuah; Na kutzung in van pawl hi na tuah.

²⁶An zate in an hloral ṭheh ding. Asinain nang cu kumkhua in na hmun ding; An zate in hnipuan bangtuk in an ṭet thluh ding; Hnipuan vekin na thleng hai ding ih an hloral ṭheh ding.

²⁷Sikhalsehla nang cu nangmah keel thotho na si; Na nunnak cu cem ti a nei lo.

²⁸Kan tefa pawl hnangam zetin an um ding ih, An tesinfa pawl nangmah ih humhimnak sungah kumkhua in an um ding a si.