Read Falam Chin SAAM HLABU 103 Bible Online

SAAM HLABU 103 - Falam Chin bible

SAAM HLABU 103

¹[88] Maw ka nunnak, BAWIPA cu thangṭhat aw; Ka sungih ummi hmuahhmuah in, A hmin thianghlim cu thangṭhat uh.

²Maw ka nunnak, BAWIPA cu thangṭhat awla, A ṭhatnak hmuahhmuah hngilh hlah aw.

³Amah in ka sualnak hmuahhmuah i ngaithiam ih, Ka natnak hmuahhmuah i damter.

⁴A thukmi thlaan ihsin i suah ih, A hmunmi duhdawtnak le lainatnak thawn i thlawsuah.

⁵Ka nunnak cu thil ṭha in a khahter ih, Muvanlai bangin cak le no in i umter a si.

⁶BAWIPA cun an namthlakmi pawl ṭan in thu a ṭhen, An co ding mawi a coter hai.

⁷A tumtahmi cu Moses hnenah a sim ih, Thil a ti thei zia cu Israel hnenah a langter.

⁸BAWIPA cu zaangfahnak le lainatnak a nei; A thin a sau ih a hmunmi duhdawtnak in a khat.

⁹Mi a kawk ringring lo ding ih, Kumkhua in a thin a heng fawn lo ding.

¹⁰Kan tuar ding zat in in tuarter siang lo ih, Kan sualnak le kan mawhnak man zat in in cawh lo.

¹¹Ziangahtile van cu, Leilung hnakih a saanzet bangin, Amah a ṭihzahtu hrangah, A duhdawtnak cu a saangzet a si.

¹²Nisuahnak cu nitlaknak ihsin, A hlatzet bangin, Kan sualnak pawl cu kan hnen ihsin hlatzet ah a ret a si.

¹³Pa in a faale pawl cu, A zaangfahzet hai bangin, Cubangtuk in BAWIPA in Amah a ṭihzahtu pawl cu a zaangfah hai a si.

¹⁴Ziangahtile Amah in kan taksa siam daan cu a thei ih, Leivut lawng kan si kha, A ciing ringring a si.

¹⁵Milai ih nunnak cu hrampi vek a si; A ṭhang ih hramlak pangpar bang in a par;

¹⁶Thli in a hran ih a hloralta, Zohman in an hmu sal nawn lo.

¹⁷Asinain amah a upattu hrangah cun BAWIPA ih duhdawtnak cu kumkhua in a hmun ih,

¹⁸A thukamnak vekih a nungtu le A thukham vekih a thlun ringringtu hrangah cun, A ṭhatnak cu sankhat hnu sankhat a hmun a si.

¹⁹BAWIPA in a siangpahrang tokham cu vancung ah a ret ih, Amah cu ziangzongza ih tlun ah siangpahrang a si.

²⁰Maw nannih vancung mi pawl, a cak le thil tithei, A ṭong a ngai ih a thupekmi a thluntu pawl, BAWIPA cu thangṭhat uh.

²¹Maw nannih van ralkap pawl, a duhmi tuahsak ih, Amah a riantu pawl, BAWIPA cu thangṭhat uh.

²²BAWIPA ih seemsuahmi pawl, A uk sung khuazakip ih um pawl, BAWIPA cu thangṭhat uh. Maw ka nunnak, BAWIPA cu thangṭhat aw.