Read Falam Chin SAAM HLABU 104 Bible Online

SAAM HLABU 104 - Falam Chin bible

SAAM HLABU 104

¹Maw ka nunnak, BAWIPA cu thangṭhat aw; Maw BAWIPA ka Pathian, na va nasa so! Upatnak le sunlawinak cu hnipuan bangin na hruk ih,

²Tleunak in na thuam aw. Van tla khi puanthlam bangin na pharh ih,

³Tlun ih tidai parah na inn cu na sak; Khawdur cu na rangleng ah na hmang ih, Thli ih thla par in na feh.

⁴Thli pawl cu na palai ah na hmang ih, Nimthlakau tleu cu na siahhlawh ah na tuah.

⁵Leilung ṭoh-nak hram cu hnget zetin na tuah ih, Ziangtik khal ah a ṭhawn aw dah lo ding.

⁶Tipithuanthum cu leilung ṭoh-nak parah puan bangin na phah ih, Tidai in tlang pawl tla a khuh.

⁷Asinain tidai cu na kawk tikah an tlan; Na thupeknak aw an theih tikah zamrang in an tlanhlo.

⁸Tlangpar ihsin an dawp ih phai rawn ah an tlan; An hrangih na tuah ciami hmun an pan.

⁹An lan thei lo dingmi ramri na tuah sak, Leilung an khuh sal lonak dingah.

¹⁰Cerh pawl cu horkuam ihsin na puutter ih, Tlang karlak in tidai na luanter.

¹¹Tivate in ramsa phunkip tidai an pe ih, Hramlak rang khal in an tihal an riamter.

¹²Tiva kap ih thingkung parah Vate in bu an sak ih hla an sak.

¹³Van ihsin tlangpar ah ruah na surter ih, Leilung cu na thlawsuahnak in a khat.

¹⁴Ṭilva hrangah hrampi na cerh ter ih, Milai hrangah thingkung le hrampi na khohter. Thlai rawl a ciing ih,

¹⁵A thin nuamtertu dingah sabit, A lungawitertu dingah olif hriak le A tha caktertu dingah rawl na tuahsak a si.

¹⁶Lebanon ih sidar thingkung in ruah tampi a ngah, A phun ciami BAWIPA ih thingkung pawl cun.

¹⁷Cutawkah vate phunkim in bu an tuah; Vaca tla cun farthing parah a inn a sak.

¹⁸Zaathar pawl cu tlangsaang par ah an um ih, Meingan pawl cu khaam lakah an relh.

¹⁹Thla siarnak ah thlapi na tuah, Ni khal in tlak caan a thei.

²⁰Zan na tuah ih khawthim lakah Hramlak ramsa hmuahhmuah an suak.

²¹Kiosa no pawl cu sa deh duh ah an huuk ih, Pathian ih pekmi an rawl an hawl.

²²Ni a suah tikah an tlung sal, Anmah ih kua ciar ah an bok.

²³Milai pawl cu hnaṭuan dingah an feh ih, Zanlam tiang hna an ṭuan.

²⁴Maw BAWIPA na tuahmi hi an tam ngaingai; Fimnak thawn na tuah ṭheh hai. Leilung cu na tuahmi thil nung in an khat a si.

²⁵Tipithuanthum cu a tum zetih a kau ngaingai fawn. Siar cawk lo thilnung a tum a seen in a sungah an um.

²⁶A parah lawng an feh ih, Na tuahmi ṭihnungza ramsa Leviathan cu a sungah a lek.

²⁷An zatein nangmah an lo zoh, An ei tik caanih rawl ngah dingah.

²⁸Rawl na pek hai ih an ei; Na kut in rawl na pek ih an pum a puar.

²⁹Khatlam na hoisan tikah an thin a phang; An thaw na lak sak tikah cun an thi ih an seemnak leilung ah an kir sal.

³⁰Asinain thaw na pek tikah cun an nung; Leilung nunnak thar na pek a si.

³¹BAWIPA ih sunlawinak huham cu kumkhua in hmun hram seh. BAWIPA cu a tuah ciami parah a lungawi hram seh.

³²BAWIPA in a run zoh ih leilung cu a khur; Tlang pawl a run tham ih meikhu an suak.

³³Ka nunsung hmuahhmuah BAWIPA hnenah hla ka sak ding; Ka dam sung hmuahhmuah BAWIPA thangṭhatnak hla ka sak ding.

³⁴BAWIPA cu ka hla ah a lungawi hram seh, Ziangahtile ka lung i awiter cu Amah a si.

³⁵Misual pawl cu leilung in hloral hai seh; Mi ṭha lo pawl cu um nawn hlah hai seh. Maw ka nunnak, BAWIPA cu thangṭhat aw; BAWIPA cu thangṭhat uh.