Read Falam Chin SAAM HLABU 105 Bible Online

SAAM HLABU 105 - Falam Chin bible

SAAM HLABU 105

¹BAWIPA ih hnenah lungawi thu sim uhla a hmin cu aupi uh; A thil tuahmi cu miphun zate hnenah sim uh.

²BAWIPA hnenah hla sa uh; Amah thangṭhatnak hla sa uh. Mangbangza a tuahmi pawl cu phuang uh.

³Amah ih ta kan si ruangah nan lungawi uh; BAWIPA riantu hmuahhmuah in nan aipuang uh.

⁴Bomnak dil in BAWIPA ih hnenah feh uh; A mithmuh ah um ringring uh.

⁵Nannih a siahhlawh Abraham ih tefa pawl, A hrilmi Jakob ih tefa pawl, A nasa zetmi le mangbangza a thil tuahmi le a thuṭhennak pawl cu, ciing ringring uh.

⁷BAWIPA cu kan Pathian a si; A thukham cu leilung pumpi hrangah a si.

⁸A thukam cu kumkhua in a nungter ding ih, A thutiam cu san thawng khat tiang a thlun ding,

⁹Abraham hnenih a thukam le Isaak hnenih a thutiam mi pawl cu.

¹⁰BAWIPA in Israel hnenah, Kumkhua daih in thukamnak a tuah; Jakob hnenah san siar cawk lo hrangin thutiamnak a tuah.

¹¹“Kanaan ram ka lo pe hai ding; Nan ro a si ding,” a ti.

¹²Pathian ih minung pawl cu mi malte an si; Ram sungah mi vakvai an si.

¹³Ram khat ihsin ram dangah an ṭhawn; Mi phun khat ihsin phun dang hnenah an ceer.

¹⁴Asinain BAWIPA in zohman a hremter lo; Anmah humhim dingah siangpahrang tampi a kawk.

¹⁵“Ka hrilmi ka siahhlawh pawl dai hlah uh; Ka profet pawl tisiat hlah uh,” tiah BAWIPA in a ti.

¹⁶BAWIPA in an ram sungah paam a tlunter ih, An rawl hmuahhmuah a lak ṭheh tikah,

¹⁷Sal ih zuarmi Josef cu Hmai ah a rak thlah sung a si.

¹⁸A ke cu thir cikcin in an ṭem, A hngawng ah thir kual an thlaih;

¹⁹A thu sim ciami a kim hlan lo! BAWIPA ih thu in miding a si kha a langter.

²⁰Cule Izipt ram siangpahrang in a thlah; Miphun tampi uktu bawi cun a luatter.

²¹A ram uknak hotu bikah a ret; A ram sung hmuahhmuah uktu bawi ah a tuah.

²²Siangpahrang kut thuai ih bawi pawl tlunah thuneihnak a pek; A thuronmi pawl tlun khalah thu a nei thei a si.

²³Cule Jakob cu Izipt ram ah a vung ih cuih ram ahcun a um.

²⁴BAWIPA in a minung pawl cu a punzaiter ih, Anmah hremtu pawl hnakin a cakter hai a si.

²⁵A minung pawl hua dingah le A siahhlawh parih mi depde si dingah, Izipt mi pawl ih thinlung cu a lehter a si.

²⁶Cule a hrilmi a siahhlawh Moses le Aaron a thlah.

²⁷Pathian ih mangbangza thil an tuah ih, Izipt ramah thil khawruahhar an langter.

²⁸An ram sungah thimnak a thlenter; Asinain Izipt mi in a thupekmi an thlun lo.

²⁹An tiva pawl cu thisen ah a canter ṭheh ih An nga pawl a thihter ṭheh.

³⁰An ram cu butlak in a khat; An siangpahrang inn tiangin a khat a si.

³¹Pathian in thu a pek ih an ram cu thothe le fikfa in a khat.

³²An ram sungah ruah sur ai ah, Rial a tlakter ih nimthla a kauter.

³³Sabit kung le theipi kung pawl a siatsuah ih, Thingkung pawl a khiak ṭheh.

³⁴Amah thupek in kharbok an ra; Siar cawk loin an ra a si.

³⁵Ram sungih thinghnah le hrampi an ei ṭheh; Thlaikho hmuahhmuah an piat bul ṭheh.

³⁶Izipt mi innsang hmuahhmuah ih Fapa upabik a thah ṭheh a si.

³⁷Cule Israel mi pawl a suahpi, Annih in an sui le an ngun tla an keng; An zate in mi cak le mi harhdam hlir an si.

³⁸Israel mi pawl an suah tikah, Izipt mi pawl cu an lung a awi; Ziangahtile an ṭih zetmi an si.

³⁹Pathian in a minung pawl ih tlun ah khawdur a umter; Zan ih tleunak petu ah meisa a vaangter.

⁴⁰A hnenah an dil ih vanim a pek; Vancung ihsin rawl a pek ih khop zetin an ei a si.

⁴¹Lungpi a ongter ih tidai a put; Nelrawn ah tiva bangin a luang.

⁴²A siahhlawh Abraham hnenih A thukam thianghlim kha a ciing ringring a si.

⁴³Cutin a minung pawl cu lungawi zetin a suahpi; A hril ciami pawl cu hla sak le au phah in a hruaisuak hai a si.

⁴⁴Miphun dang pawl ih ram cu a minung hnenah a pek; An thlawh ciami lo cu a coter hai a si.

⁴⁵A minung pawl in a daan an thlun ih, A thukham pawl an thlunnak dingah a tuah ṭheh a si. BAWIPA cu thangṭhat uh!