Read Falam Chin SAAM HLABU 106 Bible Online

SAAM HLABU 106 - Falam Chin bible

SAAM HLABU 106

¹BAWIPA cu thangṭhat uh! BAWIPA ih hnenah lungawi thu sim uh, Ziangahtile amah cu a ṭha. A duhdawtnak cu kumkhua in a hmun a si.

²Mangbangza a tuahmi pawl zoso Tlamtling in a sim thei ding? Amah thangṭhatnak cu zoso a saal cawk ding?

³A thupekmi a thluntu le thudik a tuah ringringtu cu mi lungawi an si.

⁴Na minung pawl na bom tikah, Maw BAWIPA, kei khal i thei hram aw. Na run hai tikah kei khal i telhcih hram aw.

⁵Na hrilmi pawl mineinung an si tik caan cu i hmuter ve hram aw; Na miphun ih lungawinak ah i telh ve awla, Nangmah ih ro an si ruangih nunnomnak cu i coter ve hram aw.

⁶Kan pu le kan pa pawl vekin, Kannih khal kan sual zo; Thil ṭha lo kan tuah ih misual taktak kan si.

⁷Kan pupa pawl Izipt ramih an um laiah Pathian ih mangbangza a tuahmi kha an thei thei lo. A duhdawtnak a langter ringring naón an hngilh cingcing. Tipi Sen an thlen tikah, Cungnungbik Bawi cu an dodal.

⁸Asinain a kam cia vekin a hum thotho hai; A cakmi a huham langter duh ah,

⁹Tipi Sen cu thu a pek ih a caar; Lei parih a hruai hai vekin, A minung pawl a fehpi.

¹⁰A huatu pawl hnen ihsin a run hai ih, An ral pawl ih kut ihsin a hum hai a si.

¹¹Tidai in an ral pawl cu a khuh ṭheh ih, A luatmi pakhat hman an um lo.

¹²Cuih hnu lawngah a thukammi an zum ih, A hnenah thangṭhatnak hla an sa.

¹³Sikhalsehla rei lote-ah, A tuahmi hmuahhmuah an hngilh sal ih, BAWIPA ron hmaisa loin thil an tuah.

¹⁴Nelrawn ramṭhingah rawl hiarnak in an khat ih, Pathian cu an hniksak.

¹⁵Curuangah an dilmi a pek hai; Asinain thacem natsia an hnenah a thlenter.

¹⁶Cuih nelrawn ah Moses le, BAWIPA ih mi thianghlim Aaron cu an nahsiik.

¹⁷Curuangah leilung a kak ih Dathan a dolh hlo, Abiram le a innsang tla an pil ṭheh a si.

¹⁸Anmah thluntu pawl parah meisa a rung tla ih, Cuih mi ṭha lo pawl cu a kaang ṭheh hai a si.

¹⁹Horeb ah sui in cawnote zuk an tuah ih cuih cawlem cu an biak.

²⁰Pathian sunlawinak huham cu Hrampi a eitu ṭilva in a ai an awhter.

²¹Anmah runtu cu an hngilh; Izipt ramih mangbangza tuahtu Pathian cu!

²²Izipt ramih thil mak zetzet a tuahtu le, Tipi Sen ih thil khawruahhar tuahtu cu!

²³Curuangah Pathian in Amah ih minung pawl cu siatsuah a tum. Asinain a hrilmi a siahhlawh Moses cu Pathian hmaiah a ding ih anmah siatralter lo dingah Pathian thinhengnak cu a nemter.

²⁴Cule ramṭha le ramnuam cu, Zianghman ah an siar lo; Pathian ih thukam cu an zum lo.

²⁵An phunzai an tlokciar ih an puanthlam ah an to; BAWIPA ih thu cu an ngai lo.

²⁶Curuangah siatcam in ralrinnak a pek hai; “Nelrawn ramṭhing ah nan thi ding;

²⁷Nan tefa pawl cu lawki mi lakah ka ṭhekdarh ding ih, Miphun dang pawl ih ram ah an thi ding,” a ti.

²⁸Cule Pathian ih minung pawl cu Peor ih Baal khawzing biaknak ah an tel ve. Nunnak nei lo an khawzing hnenih an pekmi raithawinak ti rawl pawl an ei ve.

²⁹Curuangah Pathian ih thin an ṭeuter ih, An lakah natsia a suak.

³⁰Asinain Finehas a ding ih misual pawl thu a ṭhen; Cuticun pulhnat cu a reh.

³¹Cumi cu Finehas ih felnak ah ruahsak a si; Kumkhua in ruahsak a si ding.

³²Meribah cerhti ah BAWIPA a thin an hengter; Anmah ruangah Moses cu harsatnak a tong.

³³Moses a thin an hengter tuk ruangah a ṭong lo ding tiangin a ṭong a si.

³⁴Pathian thei lo minung pawl that thluh dingin, BAWIPA ih thupekmi a si naón an that lo.

³⁵Pathian thei lo pawl thawn an ṭhi-aw ton ih, An khawvel daan cu an cawng.

³⁶Pathian ih minung pawl cun milem an bia ih, Anmah awktu thang ah a cang.

³⁷An fanu le an fapa pawl an pek; Khawzing pawl biak thawinak ah!

³⁸Mawh nei lo thisen, A fanu le an fapa pawl ih thisen cu an suahter; Kanaan ram khawzing lem thawinak hrangah cun, Cuih thisen ruangah cuih ram cu an baalter a si.

³⁹Cutiih an tuah ruangah, Anmah tla cu mi borhhlawh an si, Pathian hmaiah mi uire ah an cang.

⁴⁰Curuangah BAWIPA cu a minung pawl parah a ai a thok; A hril ciami parah a thinlung a uih;

⁴¹Khawvel pawl kut sungah a taanta hai ih, An ral pawl in an uk a si.

⁴²A huatu pawl in an hrem ih, An kut hnuai ahcun an tuar cuahco a si.

⁴³Voi ziangzat mengso BAWIPA in a runsuak hai? Cucing in BAWIPA an dodal thotho ih, An sualnak cu a thuk sinsin.

⁴⁴Asinain an aunak cu BAWIPA in a ngai ih, An vansaannak cu a thei.

⁴⁵Anmah zawnruah ah a thukam cu a ciing; A hmunmi a duhdawtnak a tum ruangah a thinlung a ṭhum.

⁴⁶A minung a neh-nentu pawl ih thinlung sungah zaangfahnak a umter a si.

⁴⁷Maw BAWIPA kan Pathian, in run hram aw; Miphun dangdang lak ihsin in finkhawm sal hram aw; Cuticun na hmin thianghlim kan thangṭhat ding ih, Lungawi in kan lo cawimawi ding.

⁴⁸BAWIPA cu thangṭhat uh, Israel ih Pathian cu! Atu le kumkhua in thangṭhat uh! Mi hmuahhmuah in “Amen,” ti thluh hai seh. BAWIPA cu thangṭhat uh!.