Read Falam Chin SAAM HLABU 107 Bible Online

SAAM HLABU 107 - Falam Chin bible

SAAM HLABU 107

¹BAWIPA ih hnenah lungawi thu sim uh, Ziangahtile amah cu a ṭha; A duhdawtnak cu kumkhua in a hmun.

²BAWIPA cu kan thangṭhat pei, A run zomi pawl in; Nan ral kut sungin a lo run ih,

³Nisuah, nitlak, saklam le thlanglam ih a ummi, Ram dangdang ihsin a lo kirter hai a si.

⁴Mihrek cu nelrawn ramṭhing ah, Lamzin an hlo ih an vakvai; An umnak ding khawpi an pan thei hrimhrim lo.

⁵An ril a rawng, an ti a haal; An bei a dong ih an thin a cem.

⁶An harnak sung ihsin BAWIPA an ko ih, An zonzaihnak ihsin a luatter.

⁷A hruaisuak hai ih lamzin ṭha ah a fehpi; An umnak ding khawpi thleng in.

⁸A hmunmi a duhdawtnak le An hrangih mangbangza a tuahmi ruangah BAWIPA cu thangṭhat hai seh.

⁹Tihal pawl an tihal a riamter ih, Rilrawng pawl cu thil ṭha in a cawm hai a si.

¹⁰Mihrek cu thinpihnak le khawthim sungah an um; Thawngtla an si ih thir cikcin khihnak an tuar;

¹¹Ziangkimtithei Pathian ih thukham an duh lo ih, A thupekmi an el ruangah a si.

¹²Hnaṭuan khung an ṭuannak ah an baang tuk ih an tlu; Asinain zohman bawmtu le thotu an nei lo.

¹³An harsatnak sung ihsin BAWIPA an ko ih, An zonzaihnak ihsin a luatter hai.

¹⁴An riahsiatnak le khawthim sung ihsin a suahter hai ih, An thir cikcin pawl cu a ticat ṭheh a si.

¹⁵A hmunmi a duhdawtnak le an hrangih mangbangza a tuahmi ruangah BAWIPA cu thangṭhat hai seh.

¹⁶Dar ih tuahmi sangka pawl cu a khuai ṭheh ih, Thir ih tuahmi kothrolh pawl cu a deen kiak ṭheh.

¹⁷Mihrek cu an aa, an sual ruangah an na a si; An ṭhat lo ruangah an tuar a si.

¹⁸Rawl an fih ih a zoh hman an duh lo; Rilrawng in an thi zik cuahco thlang.

¹⁹An harsatnak sung ihsin BAWIPA cu an ko ih, An zonzaihnak sung ihsin a luatter hai a si.

²⁰A ṭongkam in a damter hai; Thihnak khur sung ihsin a suah hai a si.

²¹A hmunmi a duhdawtnak le An hrangih mangbangza a tuahmi ruangah BAWIPA cu thangṭhat hai seh.

²²Thawinak pe in amah hnenah lungawinak an pe pei; Lungawinak hla thawn a thil tuahmi pawl cu an phuang pei.

²³Mihrek cu tipithuanthum parah tangphawlawng in khual an tlawng; Ti par khualtlawnnak in pumcawm- nak an hawl.

²⁴BAWIPA ih thil tuahmi pawl an hmu; Ti parih mangbangza a tuahmi pawl cu!

²⁵Thu a pek ih thlipi a huuk ciamco, Tifinriat ih tisuar pawl an tho ciamco.

²⁶Tangphawlawng pawl cu tlun ah a hlirh ih, Ti hnuai ah a pilter hai. Cubangtuk ṭihnungza tikcu ahcun, Milai ih ralṭhatnak cu an hlo ṭheh.

²⁷Zuri bangin an tlu, an sawn; Thiamnak an neihmi pawl cu a lak an si ṭheh.

²⁸An harsatnak sung ihsin BAWIPA cu an ko ih, An zonzaihnak sungin a luatter hai a si.

²⁹Thlipi cu a rehter ih Tisuar cu a daiter a si.

³⁰Daihnak a um ruangah an lung a awi; An feh duhnak khua-ah him damteón A thlenpi hai a si.

³¹A hmunmi a duhdawtnak le an hrangih mangbangza a tuah ruangah BAWIPA cu thangṭhat hai seh.

³²Mi senpi khawmnak hmunah a mak zia cu an tlang-au pi pei ih, Upa pawl an tonkhawmnak hmunah an thangṭhat pei.

³³BAWIPA in tiva pawl cu, Hul verver in a caarter ih, Ticawm pawl khal a kangter ṭheh.

³⁴Ram ṭha cu ram caar le ram phul ah a canter; Cutawk ummi pawl ih ṭhat lonak ruangah a si.

³⁵Nelrawn cu ticawm umnak hmunah a tuah ih, Lei ro le lei caar cu cerhti in a khahter a si.

³⁶Mi rilrawng pawl cutawk ah a umter ih, An umnak dingah khawpi an din.

³⁷Lo ah thlaici an tuh ih hmuan ah sabit an phun; A let tampi in an khawm sal.

³⁸BAWIPA in a minung pawl cu mal a sawm ih tefa tampi an nei; An ṭilva pawl khal an ṭum suk dah lo.

³⁹Pathian ih minung pawl cu, Hremnak le harnak a phunphun in Hmuhsuammi le palcihmi ih an can tikah,

⁴⁰A hremtu pawl cu BAWIPA in a namsuk hai ih, Lamzin um lo nelrawn ramṭhing ah, Mi vakvai ah a tuah hai.

⁴¹Asinain mi zonzai pawl cu, An retheihnak ihsin a run hai ih An innsang cu tuurual bangin, a karhzaiter a si.

⁴²Cumi cu miding pawl in an hmuh tikah an lung a awi; Asinain mi ṭha lo pawl cu ṭong ding nei loin an dai khepkhep.

⁴³Mifim pawl cun hi thil pawl hi ruat ṭha hai seh; A hmunmi BAWIPA ih duhdawtnak cu thei fel hai seh.