Read Falam Chin SAAM HLABU 108 Bible Online

SAAM HLABU 108 - Falam Chin bible

SAAM HLABU 108

¹[89] Maw Pathian, ka thinlung zatein ka lo rinsan. Hla in ka lo thangṭhat ding; Maw ka thlarau, ṭhang thlang aw!

²Ka ṭingṭang le ka phirivau pawl tho thlang uh! Ni ka ṭhangphawk ding!

³Maw BAWIPA, miphun tampi lakah ka lo lawm ding. Minung tampi lakah ka lo cawimawi ding.

⁴A hmunmi na duhdawtnak vancung a thleng; Rintlak na sinak in van a dai.

⁵Maw Pathian, na maksaknak cu, Van ah khin langter aw; Na sunlawinak huham cu, Leilung pumpuluk ah langter aw.

⁶Na cahnak in in run aw; Na duhdawtmi na minung pawl an luatnak dingah, Ka thlacamnak in let hram aw.

⁷A hmun thianghlim sung ihsin Pathian in, “Lungawi zetin Shekhem cu ka ṭhenṭhek ding; Sukkoth phairawn cu ka miphun hnenah ka zem ding.

⁸Gilead cu ka ta a si; Manasseh khal ka ta a si. Efraim cu ka lukhuh a si; Judah cu ka bawi kianghrol a si.

⁹Asinain Moab cu ka kut kholhnak kheng ah ka hmang ding ih, Edom ram cu ka kedam hlonnak ah ka hmang ding, ka ta a si ti theihnak ah. Filistin ka neh ruangah ka au ding,” a ti.

¹⁰Maw Pathian, ralhruang kulhmi khawpi ah zoso i feh pi ding? Edom ah zoso i hruai ding?

¹¹Maw Pathian, in dungtun ngaingai zo maw si? Kan ralkap pawl hnenah na tel lo ding maw si?

¹²Kan ral pawl in do bawm hram aw; Ziangahtile milai ih bomnak cu man nei lo a si.

¹³Kan hnenih Pathian a ṭan ahcun kan neh ding; Kan ral pawl a neh ding a si!