Read Falam Chin SAAM HLABU 109 Bible Online

SAAM HLABU 109 - Falam Chin bible

SAAM HLABU 109

¹[90] Maw Pathian, nangmah ka lo thangṭhat; Daite in um hlah aw.

²Mi ṭha lo pawl le, Mi bumhmang pawl in in do ciamco; Ka thuhla an rel ih thuphan an per a si.

³Ṭong mawi lo zetzet hmang tahratin in rel; Thuhla zianghman um loin in dodal ciamco.

⁴Anmah cu ka duhdawt hai ih, An hrangah thla ka cam naón, Annih cun in ral thotho a si.

⁵Ṭhatnak cu siatnak in in sam ih, Duhdawtnak cu huatnak in in ruul.

⁶Ka ral thuṭhentu dingah mi ṭha lo hril awla, A huatu cu sual a puhtu ah re aw.

⁷A thu an rel tikah mi sual a si ti in thuṭhen si hram seh; A thlacamnak hman cu mawhnak ah ruahsak siseh.

⁸A san tawi sehla A hnaṭuan cu midang in co seh.

⁹A faale pawl cu pa nei lo farah si-aw hai sehla, A nupi cu nuhmei ah cang seh.

¹⁰A faale pawl cu inn nei lo, Rawl diltu ah cang-aw hai sehla, An umnak deu siava ihsin dawi vivo si hai seh.

¹¹Paisa a coihtu pawl in, A neihmi hmuahhmuah long thluh hai sehla, Mikhual pawl in a hlawhmi hmuahhmuah kha la ṭheh hai seh.

¹²A parah zohman in, Zaangfahnak nei hlah hai seh; A faale khal zohman in kilkhawi hlah hai seh.

¹³A cithlah hmuahhmuah thi ṭheh aw hai sehla, Amah ih hmin cu sankhat hnu cun hngilh fai siseh.

¹⁴A pupa pawl ih ṭhat lonak cu, BAWIPA in ciing ringring-aw sehla, A nu ih sualnak cu, Ziangtik khalah ngaidam hlah seh.

¹⁵BAWIPA in an mawhnak cu thei camcin seh; Asinain anmah cu hngilh fai ṭheh mi si hai seh.

¹⁶Cupa cu mi zaangfahnak a nei hrimhrim lo; Mi farah, mi tlasam le bawmtu nei lo pawl, A hrem ih a that hai a si.

¹⁷Midang camsiat cu a hiar ṭeuṭeu, Amah sawn camnak tuar seh. Midang thlawsuah pek cu a duh hrimhrim lo; Zohman in thlawsuahnak pe hlah hai seh.

¹⁸Hnipuan a hruk tluk in, Midang cu ol zetin siat a cam; A micamnak in a ruangpi cu tidai bangin ciah sehla, A ruh sung khalah siti bangin lut ṭheh seh.

¹⁹Hnipuan bangin amah khuhtu ah cang-aw sehla, Taikhap bangin a kimvel in kulh ringring seh.

²⁰Siazet ih i reltu ka ral pawl parah a tlun vekin BAWIPA in hrem hai seh.

²¹Asinain BAWIPA ka Pathian, i tiam cia vekin, Nangmah in kei cu i bawm ih, Na mi duhdawtnak a ṭhat ruangah kei cu i hum a si.

²²Kei cu mi rethei le mi tlasam tuk ka si; Ka thinlung cu a muril tiangin hliamnak a tuar.

²³Zanlam ih thlahliap vekin a hloral mi ka si; Pa-ngang vekin hlon meenmi ka si.

²⁴Rawl ka ei lo ruangah ka khuk a ṭhia; Ka taksa a ṭawl ih ka ruh le ka vun lawng a taang.

²⁵Mi in in hmuh tikah in hnihsan; In hmuhsuam ih an lu in thin.

²⁶Maw BAWIPA ka Pathian, i bawm hram aw. A hmunmi duhdawtnak na nei ih I run hramhram aw.

²⁷Nangmah lawng i runtu na si hi Ka ral pawl theiter hram aw.

²⁸Annih in in cam hman hai sehla, Nang cun i thlawsuah ding. I hremtu pawl cu sung hai seh. Cule kei na siahhlawh hi ka lungawi seh.

²⁹Ka ral pawl cu mualphonak in khuh hai sehla, An ningzahnak cu korfual bangin hruk hai seh.

³⁰BAWIPA hnenah ringzet in lungawinak thu ka sim ding; Misenpi hmaiah amah cu ka thangṭhat ding.

³¹Ziangahtile farah zonzai pawl hnenah a ṭang ih, Anmah thah a tumtu pawl kut sung ihsin a run hai a si.