Read Falam Chin SAAM HLABU 111 Bible Online

SAAM HLABU 111 - Falam Chin bible

SAAM HLABU 111

¹BAWIPA cu thangṭhat uh! Misenpi tonkhawmnak ah ka thinlung zate in BAWIPA ka thangṭhat ding.

²BAWIPA ih thil tuahmi pawl, Ziangtluk mangbangza so an si, Cuih thil tuahmi parih lungawitu cun a tican an thei thiam a si.

³A tuahmi cu upat tlak an si ih, Sunlawinak in an khat. A dingnak cu kumkhua in a hmun.

⁴BAWIPA in mangbangza a tuah mi pawl cu in hngilhter lo; Amah cu zaangfahnak le, lainatnak neitu a si.

⁵Amah a ṭihtu pawl cu ei ding rawl a pek hai; A thukam cu a hngilh dah lo.

⁶A thil tithei zia cu a minung pawl hnenah a langter ih, Miphun dang pawl ih ram cu a pek hai a si.

⁷A thil tuahmi hmuahhmuah cu, Rintlak an si ih an ding ṭheh. A thukham pawl cu rintlak an si.

⁸Kumkhua in a hngetmi an si ih, Felzet le dikzetih pekmi an si.

⁹A minung pawl hnenah runnak a thlenter ih, Anmah thawn kumkhua hrangin thukamnak a tuah. A thianghlimmi le huham nei zetmi a si.

¹⁰BAWIPA ṭihzah cu fim hramthawhnak a si; Cubangtuk ih a tuahtu pawl cu, Theih thiamnak ṭhazet an nei. Amah cu kumkhua ih thangṭhat ding a si.