Read Falam Chin SAAM HLABU 112 Bible Online

SAAM HLABU 112 - Falam Chin bible

SAAM HLABU 112

¹BAWIPA cu thangṭhat uh! BAWIPA a ṭihzahtu le a thupekmi a thluntu cu mi thlawsuak an si.

²A faale pawl cu hi ram sungah mi cak bik an si ding; Mi ṭha ih tesinfa pawl cun malsawm an dong ding.

³A innsang cu milian le sumsaw nei zet an si ding ih, A dingfelnak cu kumkhua in a hmun ding.

⁴Mi ṭha pawl hrangah cun Khawthim sung khalah tleunak a suak ṭheu; Lainatnak, zaangfahnak le dingnak a neitu pawl hrangah cun.

⁵Tirhsiang zetin mi a coih ih Dik zetin mah ih hna a ṭuantu cu mi lungawi an si.

⁶Mi ṭha cu a tlasam dah lo ding. Ziangtik hmanah an hngilh lo ding.

⁷Thusia theih ding kha a hreh hrimhrim lo; A zumnak a khoh ih BAWIPA ah a rinsannak cu hngetzet in a bun.

⁸Donhar a nei lo, ṭih khal a nei lo; A ral pawl an sun kha a mit rori in a hmu ding.

⁹Mi harsa le mi farah hnenah siang zetin a pek; Mi a zaangfahnak cu a ṭhum dah lo. Thil tithei a si ih zozo khalih upatmi a si.

¹⁰Cumi cu mi ṭha lo pawl in an hmuh tikah an riah a sia; An mitkem in an ha an rial ih an tlan hlo; Beiseinak an neihmi cu kumkhua in a cem a si.