Read Falam Chin SAAM HLABU 115 Bible Online

SAAM HLABU 115 - Falam Chin bible

SAAM HLABU 115

¹Maw Pathian, na hnen lawngah, Kan hnenah si loin, Nangmah ih hnen lawngah, Sunlawinak cu pek siseh; A hmunmi na duhdawtnak le zumtlak na sinak ruangah hin.

²“Khuiah so nan Pathian cu a si?” tiah ziangah so miphun dangdang pawl in in suut rero ding?

³Kan Pathian cu vancung ah a um ih a duh poh a tuah.

⁴An khawzing pawl cu sui le ngun ih tuahmi, Milai kut ih tuahmi an si.

⁵Kaa an nei naón an ṭong thei lo. Mit an nei naón an hmu thei lo.

⁶Hna an nei naón an thei thei lo. Hnar an nei naón rim an thei thei lo.

⁷Kut an nei naón an tham thei lo. Ke khal an nei naón an feh thei lo. An awn-au thiam lo.

⁸Hi khawzing pawl a tuahtu le a rinsantu pawl cu, An tuahmi milem vekah cang thluh hai seh.

⁹Maw Israel mi pawl, BAWIPA rinsan uh! Amah cu a lo bawmtu le a lo humtu a si.

¹⁰Maw Pathian ih puithiam pawl, BAWIPA rinsan uh! Amah cu a lo bawmtu le a lo humtu a si.

¹¹Maw Pathian ṭihzah tu pawl, BAWIPA rinsan uh! Amah cu a lo bawmtu le a lo humtu a si.

¹²BAWIPA cun in thei ringring ih thlawsuahnak in pe ding. Israel mi le Pathian ih puithiam pawl cu Pathian in a thlawsuah hai ding.

¹³Amah a ṭihzahtu cu a tum a seen in a thluasuah hai ding.

¹⁴Nanmah le na tesinfa pawl cu BAWIPA in tefa lo pe hram seh.

¹⁵Lei le van tuahtu BAWIPA in Thlawsuah lo pe hram seh.

¹⁶Van khi BAWIPA ih ta an si; Amah ih ta lawnglawng an si ṭheh. Asinain leilung cu minung kutah a pek.

¹⁷BAWIPA cu mithi pawl in an thangṭhat lo; ṭong thei lonak hmun a thlengtu pawl cun an thangṭhat lo a si.

¹⁸Sikhalsehla kannih a minung pawl cun atu le kumkhua in amah kan thangṭhat ding. BAWIPA cu thangṭhat uh!