Read Falam Chin SAAM HLABU 116 Bible Online

SAAM HLABU 116 - Falam Chin bible

SAAM HLABU 116

¹BAWIPA cu ka duh; Ka thlacamnak le zaangfah ka dilnak a theih ruangah.

²Ka kawh tinte ka aw a thei.

³Thihnak cun a hridai in i run ngerh ih, ṭihnungza thlaan in i naih deuhdeuh ruangah, Donharnak le ṭihphannak in ka khat.

⁴BAWIPA cu ka ko ih, “Maw BAWIPA, zaangfah ka lo dil, i run hram aw,” ka ti.

⁵BAWIPA cu a ṭha ih zaangfahnak a nei; Kan Pathian cu zaangfah lainatnak in a khat.

⁶BAWIPA in bawmtu nei lo pawl cu a hum; ṭihphannak hmun ihsin i luatter.

⁷Maw ka nunnak, hnangamte in cawl aw, Ziangahtile BAWIPA cun ka zawn i ruat ringring a si.

⁸BAWIPA cun thihnak ihsin i luatter; Ka mitthli a hulter ih ka ke khal tlukbahnak ihsin a luatter.

⁹Curuangah BAWIPA ih hmaiah ka feh ih, A nungmi pawl ih ram ahcun ka leeng.

¹⁰“Ka cem riai a si hi,” ka ti hmanah ka zumnak a der cuang lo.

¹¹Ṭihphannak ka neih ih, “Zumtlak zohman an um lo,” ka ti hmanah ka rinnak cu a ṭum cuang lo.

¹²Ka parih a ṭhat ruangah hin BAWIPA cu ziangso ka pek ve ding?

¹³BAWIPA in i run ruangah A hnenah in ding thawinak ka pe ding ih a hmin ka ko ding.

¹⁴A hnenih ka kam ciami cu A minung pawl tonkhawmnak ah amah ka pe ding.

¹⁵Amah ih minung pakhatkhat an thih tikah, BAWIPA ih hrangah ziangtluk in so a man a khun?

¹⁶Maw BAWIPA, kei hi na siahhlawh ka si; Ka nu vekin kei khal in nangmah ka lo rian; Nangmah in zalennak i pe zo.

¹⁷Lungawi thawinak ka lo pe ding, Na hmin cu ka ko ding.

¹⁸Na minung pawl an tonkhawmnak le Jerusalem ih na Biakinn khaan sungah,

¹⁹Na hnenih ka tiamkam ciami cu Ka lo pe ding a si. BAWIPA cu thangṭhat uh!