Read Falam Chin SAAM HLABU 118 Bible Online

SAAM HLABU 118 - Falam Chin bible

SAAM HLABU 118

¹BAWIPA ih hnenah lungawi thu sim uh; Ziangahtile amah cu a ṭha, A duhdawtnak cu kumkhua in a hmun a si.

²Israel mi pawl in, “A duhdawtnak cu kumkhua in a hmun,” ti hai seh.

³Pathian ih puithiam pawl in, “A duhdawtnak cu kumkhua in a hmun,” ti hai seh.

⁴Amah a ṭihzahtu pawl in, “A duhdawtnak cu kumkhua in a hmun,” ti hai seh.

⁵Ka harsat laiah BAWIPA cu ka ko; Ka kawhnak a thei ih luatnak i pek.

⁶BAWIPA cu ka hnenah a um; Zianghman ka ṭih lo ding. Milai in ka parah ziangso an tuah thei ding?

⁷I bawmtu cu BAWIPA amah a si; Ka ral an sun kha ka mit in ka hmu ding.

⁸Milai rinsan hnakin BAWIPA rinsan a ṭha sawn.

⁹Leilung uktu pawl rinsan hnakin BAWIPA rinsan a ṭha sawn.

¹⁰Ka ral pawl ka kiangkap ah an um ṭheh; Asinain BAWIPA ih huham in ka siatsuah ṭheh hai.

¹¹Ka kimvel in in kulh ṭheh; Asinain BAWIPA ih cahnak in ka cemter ṭheh hai.

¹²Khuai bangin in herh ciamco; Asinain hrambur meisa kaang bang in an kaang ṭheh. BAWIPA ih huham in ka siatsuah ṭheh hai a si.

¹³Neh ding rori in nasa zetin in do ih ih neh cuahco; Asinain BAWIPA in i bawm.

¹⁴BAWIPA in huham neizet le cakzet ah i tuah; Amah cu i runtu a si.

¹⁵BAWIPA ih minung pawl an puanthlam ihsin nehnak lungawi ih an au ciamco cu ngaihnik uh; “BAWIPA ih baan thacak in a neh zo.

¹⁶A huham in nehnak in pe zo; A ral nehnak huham cak cun!” an ti.

¹⁷Ka thi lo ding, ka dam ding ih BAWIPA ih thil tuahmi pawl ka aupi ding.

¹⁸Nasa zetin i hrem zo; Asinain i thiter siang lo a si.

¹⁹Ka hrangah dingfelnak kotka i on sak hram uh; Ka lut ding ih BAWIPA ih hnenah lungawi thu ka sim ding.

²⁰BAWIPA ih kotka cu hihi a si; A dingmi lawng an lut thei ding.

²¹Maw BAWIPA, ka aunak aw i thei ih, Nehnak i pek ruangah ka lo thangṭhat a si.

²²Inn saktu pawl in santlai lo, ti ih an hnonmi lungto cu, A ṭhahnem bikmi lungto ah a cang zo.

²³Cumi cu BAWIPA ih tuahmi a si; Zohthanungza a va si so!

²⁴Tuih ni hi BAWIPA ih tuahmi ni a si; Lungawi aipuang in um uhsi!

²⁵In hum aw, BAWIPA, in hum hram aw; Maw BAWIPA, hlawhtlinnak in pe hram aw!

²⁶BAWIPA ih hmin in a rami cu, Pathian in thlawsuah hram seh! BAWIPA ih Biakinn ihsin thlawsuahnak kan lo pek.

²⁷BAWIPA cu Pathian a si; Kan hnenah tleunak in pe zo. Nan kutah thinghnge keng in puai cu tuah uhla, Biakṭheng cu heel rero uh.

²⁸Nangmah cu ka Pathian na si ih, Lungawinak thu ka sim ding; Na maksaknak ka tlang-au pi ding.

²⁹BAWIPA ih hnenah lungawi thu sim uh, Ziangahtile a mah cu a ṭha; A duhdawtnak cu kumkhua in a hmun a si.