Read Falam Chin SAAM HLABU 119 Bible Online

SAAM HLABU 119 - Falam Chin bible

SAAM HLABU 119

¹[92] A nunnak ah soisel ding a um lo mi le, BAWIPA ih daan vekih a nungtu pawl cu mi lungawi an si.

²A thinlung zate in BAWIPA ih thu a ngaitu le, A thupekmi pawl a thluntu cu mi lungawi an si.

³Asi, thilsual zianghman tuah loin BAWIPA ih lamzin ahcun an feh.

⁴Na daan pawl cu in pe zo ih Felte ih thlun dingah in tiam zo.

⁵Na daan terek pawl tiangin, Felte in thlun thei ningla ka va duh so!

⁶Taima zetih na thukham pawl ka thlun ahcun, Ningzak in ka um lo ding.

⁷Thinlung thiang in ka lo thangṭhat ding, Na thuṭhennak felzia ka theih hnu ahcun!

⁸Na daan pawl cu ka thlun ding; I taanta hram hlah aw!

⁹Ziangtin so mino in ziaza thiang a neih thei ding? Na thupekmi thlun lawngin a nei thei ding.

¹⁰Ka thinlung zatein nangmah lo rian dingah ka pe-aw, Na thukham pialsan lo dingah i kilkhawi aw.

¹¹Ka thinlung sungah na daan cu ka ret zo, Na parih ka sual lonak dingah.

¹²Maw BAWIPA, nangmah ka lo thangṭhat; Na daan pawl i zirh hram aw.

¹³Na thukham in pekmi pawl cu ring zetin ka saal ringring ding.

¹⁴Sumsaw tampi neih hnakin Na thupekmi thlun ah ka lung a nuam sawn.

¹⁵Na nunsimnak cu ka zir ding ih, Na thuzirhmi pawl cu ka ruat ṭha ding.

¹⁶Na daan pekmi ah lungawinak ka nei ih, Na thupekmi pawl cu ka hngilh lo ding.

¹⁷Ka nundam ih na thu ka thlun theinak dingah, Kei na siahhlawh parah hin ṭha hram aw.

¹⁸Na daan sungah mangbangza thudik ka hmuh theinak dingah ka mit cu vaangter hram aw.

¹⁹Leitlun ahhin rei lote sung lawng ka um; Ka hnen ihsin na thukham cu thup hram hlah aw.

²⁰Na thuṭhennak theih ka duh ringring ruangah, Ka thinlung cu mei bangin a hlio ringring.

²¹Mi puarthau na kawk hai ih Na thupekmi a pahtu pawl cu, Siat na serh hai a si.

²²Na thukham ka thlun zo ruangah ka parih hmuhsuam le nautatnak an neihmi in i luatter hram aw.

²³Hotu pawl an tonkhawm ih in phiar rero hmanah, Kei na siahhlawh in na daan cu ka zir thotho ding.

²⁴Na thuzirhmi pawl cu lungawinak i petu an si ih ruahnak ṭha i petu khal an si.

²⁵Ka nunnak cu leivut lakah namnuai in a um; Na thutiam cia vekin ka tha tlungter sal hram aw.

²⁶Ka tuah mi hmuahhmuah ka phuang ih nang in i thei; Na thupekmi pawl i zirh hram aw.

²⁷Na daan thlun thei dingah i zirh awla, Mangbangza na thuzirhmi cu feltein ka ruat ṭha ding.

²⁸Riahsiatnak ruangah ka thinlung a zup ṭheh; Na thutiam cia vekin ka tha tlungter sal hram aw.

²⁹Zin peeng ka zawh lonak dingah i kilveng aw; Na ṭhat ruangah na daan cu i zirh aw.

³⁰Na thu thluntu si dingah ka ruat cat zo; Na thukham pawl cu ka hmai ah ka ret zo.

³¹Maw BAWIPA, na thuzirhmi pawl cu ka thlun zo; Mualpho in i ret hram hlah aw.

³²Nangmah in theihthiamnak i pek ding ruangah, Na thupekmi cu thatho zetin ka thlun ding.

³³Maw BAWIPA, na thupekmi ih tican i sim awla, Ziangtik khalah cat loin ka thlun ringring ding.

³⁴Na daan pawl cu i zirh fiang awla ka thlun hai ding; Ka thinlung zate in ka thlun ding.

³⁵Na thukham thlun thei dingah i hruai aw; Ziangahtile cutawkah lungawinak ka ngah a si.

³⁶Lennak duhtu si loin na thupekmi thlun duhtu sawn i siter aw.

³⁷Thil ṭhahnem lo a hawl rerotu Ka si lonak dingah i kilkhawi aw. Na thutiam cia vekin ka parah ṭha hram aw.

³⁸Nangmah a lo ṭihzahtu pawl hnenih na thukamnak cu, Kei na siahhlawh hnen ahhin kimter hram aw.

³⁹Ka ṭihzetmi nautatnak ihsin i luatter hram aw; Na thupekmi pawl cu mangbangza ngaingai an si!

⁴⁰Na thupekmi cu ka sunsak a si; A dingmi na si ruangah i nungter hram aw.

⁴¹Maw BAWIPA, i duhdawtnak a maksakzia langter hram aw, Na thutiam cia bangtuk in i run hram aw.

⁴²Cuticun i nautattu pawl cu An thu ka sawn thei hai ding; Ziangahtile na ṭongkam cu ka rinsan a si.

⁴³Thudik a sim ngam ringringtu si dingah thazaang i pe aw; Ziangahtile na thuṭhennak khi ka beiseimi a si.

⁴⁴Na daan pawl cu ka thlun ringring ding; Kumkhua cat nawn loin ka thlun ding a si.

⁴⁵Na thupekmi pawl thlun dingih ka hawl suak ruangah, A famkimmi zalennak sungah ka nung ding.

⁴⁶Na thupekmi cu siangpahrang pawl hnenah ka than ding; Ka zahpi hrimhrim lo ding.

⁴⁷Na thukham pawl thlun cu ka diriamnak a si. Ziangahtile ka ngainatmi an si.

⁴⁸Na thukham pawl cu Ka uar mi le ka duhmi an si; Na thupekmi cu ka thinlung ah ka ruat ṭha ringring ding.

⁴⁹Na siahhlawh kei ka hnenih, Na thutiam cu hngilh hram hlah aw; Beiseinak i neihter zo.

⁵⁰Ka vansaan caan hmanah i hnemtu a si; Ziangahtile na thutiam in nunnak i pek.

⁵¹Mi puarthau pawl in in hmuhsuam; Asinain na daan pekmi ihsin ka pial dah lo.

⁵²Kan dung caan reipi laiih i pekmi na thu pawl cu, ka ciing ringring; Maw BAWIPA, ka hrangah hneemtu an si.

⁵³Mi ṭha lo pawl in na daan an balsiat kha ka hmuh tikah, Ka thin a heng ngaingai.

⁵⁴Hi leitlun khual ka tlawnnak ramah hin, Na thukham pawl cu ka hlasakmi an si.

⁵⁵Maw BAWIPA, zan khalah nangmah ka lo ruat ih, Na daan khal ka ruat a si.

⁵⁶Na thupekmi thlun cu Ka lungawinak a si.

⁵⁷Maw BAWIPA, ka duhmi cu nangmah lawng na si; Na daan thlun dingah thu ka kam zo.

⁵⁸Ka thinlung taktein ka lo ngen a si; Na thutiam cia bangin, Ka parah zaangfahnak nei hram aw.

⁵⁹Ka nunnak ih a zawhmi lamzin hi ka zoh sal ih, Na thupek thlun dingah ka lo kam a si.

⁶⁰Khulfung loin na thukham thlun dingah zamrang in ka tho.

⁶¹Mi ṭha lo pawl cun an thang in fekzet in in khit; Asinain na thupekmi ka hngilh lo.

⁶²Zanṭim ah ka ihnak ihsin ka ṭhang; A dingmi na thuṭhennak thangṭhat dingah.

⁶³Na daan a thluntu le A lo riantu hmuahhmuah ih rualpi ka si.

⁶⁴Maw BAWIPA, leilung pumpi hi a hmunmi na duhdawtnak in a khat. Na thukham pawl i zirh hram aw.

⁶⁵Maw BAWIPA, na thutiammi cu na kimter ih, Kei na siahhlawh hnenah na ṭha a si.

⁶⁶Fimnak le thuruah thiamnak i pe hram aw; Ziangahtile na thukham ka rinsan a si.

⁶⁷Hrem ka si hlan ahcun zinpeng ka zawh ṭheu; Asinain atu ahcun na thu ka thlun.

⁶⁸Na ṭhatzia le mi na zaangfah zia cu! Na thukham pawl i zirh hram aw.

⁶⁹Mi hngal pawl in ka thu cu Thuphan hlir in an rel; Asinain ka thinlung zate in na daan cu ka thlun.

⁷⁰Hi bangtuk minung pawl cun Theihthiamnak an nei lo; Asinain na daan sungah lungawinak ka nei.

⁷¹I hremnak cu ka hrangah a ṭha; Ziangahtile na thupekmi i zirter a si.

⁷²I pekmi na daan cu leilung pumpi ih sui le ngun hmuahhmuah hnakin ka hrangah a sunglawi sawn.

⁷³Nangmah in i seemsuah ih nangmah in himte in i kilveng; Na daan pawl ka zirnak dingah ruahthiamnak thinlung i pe hram aw.

⁷⁴A lo ṭihzahtu pawl cun In hmuh tikah an lung a awi ding; Ziangahtile na thu cu ka rinsan.

⁷⁵Maw BAWIPA, na thupekmi pawl cu an dik a si ti ka thei; Zumtlak na si ruangah I hrem a si ti khal ka thei.

⁷⁶Kei na siahhlawh i tiamkam cia vekin, A hmunmi na duhdawtnak in i hneem hram seh.

⁷⁷I zaangfah awla ka nung ding; Ziangahtile na daan sungah ka lung a awi a si.

⁷⁸Mi puarthau pawl in, Sual in puh ruangah an ningzak seh; Kei cun ka thinlung sungah, Na daan pawl cu ka ruat ṭha ding.

⁷⁹Na thupekmi a theitu pawl le Nangmah a lo ṭihzahtu pawl cu ka hnenah ra hai seh.

⁸⁰Ningzak mualpho ih ka um ve lonak dingah, Na thukham cu famkim zetin thlun thei hram ning law!

⁸¹Maw BAWIPA, nangmah runnak Ka hngahnak ah ka hnang ṭheh; Na thu cu ka rinsan fawn si!

⁸²Na thutiammi ka zoh-nakah Ka mit a kham ṭheh zo; “Ziangtik ah so i bom ding?” tiah sut loin ka um thei fawn lo!

⁸³An hlon ciami savun sabit thawl vekin santlai lo ka si; Asinain na thupekmi cu ka hngilh hrih lo.

⁸⁴Ziangtik tiangso ka lo hngah hrih ding? I hremtu pawl hi ziangtik ah so na hrem ve hai ding?

⁸⁵Na daan a thlun lotu mi hngal pawl in, Ka tlaknak dingah khur tampi an lai.

⁸⁶Na thukham pawl cu rintlak zet hlir an si; Mi hngal pawl cun thuphan hlir in in hrem zok rero; I bawm hram aw.

⁸⁷Atu-ah cun in that thei zik ngaingai thlang; Asinain na thupekmi pawl cu ka daithlan cuang lo.

⁸⁸A hmunmi na duhdawtnak ruangah Ka parah ṭha hram aw. Cuticun na daan pawl cu ka thlun thei ding.

⁸⁹Maw BAWIPA, na thu cu kumkhua in a hmun ding; Vancung ih a hnget zomi thu a si.

⁹⁰Zum tlak na sinak cu Sankhat hnu sankhat a hmun; Leilungpi hi nangmah in na retih Na retnak ihsin a ṭhawn dah lo.

⁹¹Ziang hmuahhmuah na thupek vekin tuih sun tiang an hmun; Ziangahtile an zatein a lo riantu an si.

⁹²Na daan pawl hi ka lungawinak ih hrampi sihlah sehla, Ka zonzaihnak ah ka thi zo ding.

⁹³Na thupekmi pawl ziangtik hmanah ka daithlan lo ding; Ziangahtile cupawl cu na hmang ih nunnak i pek.

⁹⁴Kei cu na ta ka si, I run hram aw. Na thupekmi thlun ding lawng ka tummi a si.

⁹⁵Mi ṭha lo pawl in thah dingah in bawh; Asinain na daan cu ka thinlung in ka ruat ṭha ding.

⁹⁶A famkimmi zianghman a um lo, ti ka thei zo; Asinain na thukham cu a famkim a si.

⁹⁷Aw, na daan pawl ka duh zia cu! Sun nihlawh in acu lawng ka ruat!

⁹⁸Na thukham cu ka hnenah a caam ringring; Ka ral pawl hmuahhmuah hnakin i fimter deuh a si.

⁹⁹I zirhtu pawl hmuahhmuah hnakin ka thei deuh, Na thuzirhmi pawl ka ruah ṭha ruangah.

¹⁰⁰Patar pawl hnakin ka fim deuh, Na thupekmi ka thlun ruangah.

¹⁰¹Ziaza ṭha lo cu ka hrial zo, Na thu thlun ka duh ruangah.

¹⁰²Na thuzirhmi ka daithlan lo, I zirhtu nangmah na si ruangah.

¹⁰³Na thupekmi pawl an thlum zia cu! Khuaitizu hnakin an thlum sawn.

¹⁰⁴Na thukham pawl ihsin fimnak ka ngah ih, Nuncan ṭha lo hmuahhmuah cu ka hua a si.

¹⁰⁵Na thu cu ka ke hrangah mei-inn a si ih, Ka lamzin hrangah tleunak a si.

¹⁰⁶Siatcam ih thu ka kam vekin, A dikmi na thuzirhnak cu ka thlun ding.

¹⁰⁷Maw BAWIPA, ka tuarzia cu a nasa ngaingai; I tiamkam zo vekin i nungter hram aw.

¹⁰⁸Maw BAWIPA, ka lungawi thlacamnak cu saang hram awla, Na thupekmi cu i zirh hram aw.

¹⁰⁹Nitin ka nunnak pe dingin ka tiar aw; Na daan pawl ka hngilh lo a si.

¹¹⁰Mi ṭha lo pawl in ka hrangah thang an kam; Asinain na thupekmi pawl cu ka pah lo.

¹¹¹Na thukham pawl cu kumkhua in ka ta an si; Ka thinlung nuamtertu an si.

¹¹²Na thupekmi pawl cu ka thih ni tiangih thlun dingah, ka ruat cat zo a si.

¹¹³Na hnenih thinlung reprai Nei lotu pawl cu ka mit an kem; Asinain na daan cu ka duh.

¹¹⁴Nang cu ka beunak le ka ralphaw na si; Na thutiam ah beiseinak ka nei.

¹¹⁵Maw misual pawl, ka hnen ihsin tlan uh; Ka Pathian ih thukham pawl cu ka thlun ding.

¹¹⁶I kam cia vekin thazaang i pe awla ka nung ding; Ka ruahsannak ah ka riah i siatter hlah aw.

¹¹⁷I kai awla ka him ding; Cule na thupekmi pawl cu ka seherh ringring ding.

¹¹⁸Na daan a pahtu pawl cu na hnon hai; An mibum thiamnak cu a lak a si.

¹¹⁹Mi tha lo pawl cu hnawmhne tlukah na ruat hai; Curuangah na thuzirhnak cu ka duh zet.

¹²⁰Nangmah ih ruangah ka thin a phang; Na thuṭhennak ruangah ṭihnak in ka khat.

¹²¹A dikmi le a ṭhami cu ka tuah zo; Ka ral pawl ih kut sungah i taanta hlah aw.

¹²²Ka lo bawm ding tiah, Na siahhlawh kei hi i tiam aw; Mi puarthau pawl in i neh-nen hlah hai seh.

¹²³Na runnak le bomnak zoh ah ka mit a kham ṭheh zo; Na tiam ciami luatnak ka zohnak ah!

¹²⁴A hmunmi na duhdawtnak thawn i zoh awla, Na thupekmi pawl i zirh aw.

¹²⁵Kei hi na siahhlawh ka si, Theihthiamnak i pe aw; Na thuzirhmi pawl ka theih theinak dingah.

¹²⁶Maw BAWIPA, na hnaṭuan thok a cu thlang, Milai in na daan an pah vivo!

¹²⁷Na thukham cu sui hnakin ka duh sawn; Leitlun ih sui ṭha bik hnakin.

¹²⁸Curuangah na thuzirhmi pawl hmuahhmuah ka thlun ih, Um daan dik lo pawl cu ka hua.

¹²⁹Na thuzirhmi pawl cu mangbangza in an ṭha; Curuangah ka thinlung zate in ka thlun.

¹³⁰Na thuzirh fiangtermi in tleunak a pek; Mi lungmol hnenah fimnak a pek a si.

¹³¹Na thupekmi pawl ka hiar tuk ruangah, Ka kaa ang in tidai haal in ka haal.

¹³²Nangmah a lo duhtu pawl na zaangfah bangin, Ka lam hoi awla i zaangfah hram aw.

¹³³I tiamkam cia bangin i bahter hram hlah aw; ṭhat lonak ih uk ding cu i siang hram hlah aw.

¹³⁴I neh-nentu pawl ih kut ihsin i hum awla, Na thupekmi cu ka thlun ding.

¹³⁵Na mithmai ṭha cu ka parah, Ni bangin tlangter awla, Na daan pawl cu i zirh hram aw.

¹³⁶Ka mitthli cu tidai bangin a luang; Milai in na daan an thlun lo ruangah.

¹³⁷Maw BAWIPA, nang cu a dingmi na si ih, Na thupekmi khal an dik.

¹³⁸Na thuzirhmi cu an fel ih, Rintlak an si ih an ṭha.

¹³⁹Ka thinhengnak cu meivam bangin a ling, Ka ral pawl in na thukham an poisat lo ruangah.

¹⁴⁰Na thukam cu ziangtluk in so rintlak a si! Na siahhlawh in ziangtluk in so ka duh!

¹⁴¹Mi nauta le nautatmi ka si naón, Na thupekmi pawl cu ka daithlan lo.

¹⁴²Na dingnak cu kumkhua in a dingmi an si ih, Na daan cu an dik ringring.

¹⁴³Harsatnak le donharnak in ka khat; Asinain na thukham in lungawinak i pek.

¹⁴⁴Na thuzirhnak cu kumkhua in a dik; Theihthiamnak i pe awla ka nung ding.

¹⁴⁵Ka thinlung taktein ka lo ko; Maw BAWIPA, i sawn awla na thu ka thlun ding.

¹⁴⁶Nangmah cu ka lo ko; I hum awla na daan ka thlun ding.

¹⁴⁷Khua a van hlan ihsin, Na bomnak dil in ka lo ko; Na thukam ah beiseinak ka nei.

¹⁴⁸Zanvarte itthat loin ka um; Na thuzirhmi pawl ngaihtuahnak ah!

¹⁴⁹Maw BAWIPA, na duhdawtnak ruangah i run ngai hram aw! Na ṭhatnak ruangah ka nunnak cu zuah hram aw!

¹⁵⁰Mi zaangfah nei lo i hremtu pawl cun in naih deuhdeuh; Na daan a thlun dah lotu pawl cun!

¹⁵¹Asinain maw BAWIPA, nang cu ka kiangah na um; Na thukam cu kumkhua hrang a si.

¹⁵²Na thuzirhmi cu hlanlaipi in ka zir zo; Kumkhua daih ih na pekmi an si.

¹⁵³Ka harsatnak hi zoh awla i run aw; Na daan cu ka daithlan dah lo!

¹⁵⁴I ṭan awla i luatter hram aw; Na thutiam cia vekin nundamnak i pe aw.

¹⁵⁵Mi ṭha lo pawl cu runmi an si lo ding; Na daan an thlun dah lo ruangah!

¹⁵⁶Asinain maw BAWIPA, Na lainatnak cu a tum ngaingai; I zaangfah awla i run hram aw.

¹⁵⁷I raltu le i hremtu tampi an um; Asinain na daan cu thlun loin ka um dah lo!

¹⁵⁸Mi phiartu pawl ka hmuh tikah, Ka mit an kem nasa; Na thupekmi an thlun dah fawn lo!

¹⁵⁹Maw BAWIPA, na thuzirhmi ka duh zia hi zohhnik! A hmunmi na duhdawtnak ruangah i hum hram aw.

¹⁶⁰Na daan ih muruh cu thutak a si; A dikmi na thukham pawl cu kumkhua in an hmun.

¹⁶¹Ziang thu hman um loin, Mi upa cak zetzet pawl in in raal; Asinain ka upatmi cu na daan lawng a si.

¹⁶²Na thukam ruangah ziangtluk in so ka lung a awi; Thilri mankhung sartu bangin.

¹⁶³Thuphan hmuahhmuah cu ka hua ih ka fih; Asinain na daan cu ka ngaina.

¹⁶⁴Na hnenah nitin voi sarih lungawinak thu ka sim, Na thuṭhennak a fel ruangah.

¹⁶⁵Na daan a duhtu pawl cu, Humhimnak famkim an ngah; Zianghman in a bahter thei hai lo a si.

¹⁶⁶Maw BAWIPA, i run dingah ka lo hngak; Na thupekmi ka thlun a si.

¹⁶⁷Na daan pawl cu ka thlun hai; Ka thinlung zate in ka duh a si.

¹⁶⁸Na thupekmi le na thuzirhmi pawl cu ka thlun; Ka tuahmi hmuahhmuah na hmu ṭheh a si.

¹⁶⁹Maw BAWIPA, bomnak dil ih ka aunak cu, Na hnenah thleng hram seh. Na thutiam vekin theihthiamnak i pe aw.

¹⁷⁰Ka thlacamnak cu na hmaiah thleng hram seh; Na thutiam vekin i run hram aw.

¹⁷¹Cat loin ka lo thangṭhat ding; Na thu i zirh zo ruangah.

¹⁷²Na daan cu hla in ka sa ding; Na thupekmi pawl an dik ruangah.

¹⁷³Keimah bawm dingah tiar cia in um hram aw; Na thukham ka thlun ruangah.

¹⁷⁴Maw BAWIPA, na runnak ka ngai zia cu! Na daan sung lawngah lungawinak ka nei a si!

¹⁷⁵Nunnak i pe hram aw, Ka lo thangṭhat ringring ding; Na thuzirhmi in i bawm hram seh.

¹⁷⁶A hlomi tuu vekin ka vakvai; Ra awla kei na siahhlawh hi i ra hawl hram aw; Na thupekmi ka daithlan lo a si.