Read Falam Chin SAAM HLABU 132 Bible Online

SAAM HLABU 132 - Falam Chin bible

SAAM HLABU 132

¹Maw BAWIPA, David cu ciing ringring awla, A tuarmi hmuahhmuah khal hngilh hram hlah aw.

²Maw BAWIPA, Jakob ih Pathian, Cungnungbik Bawi, na hnenih thu a tiammi le siatcam ih thu a kammi cu ciing hram aw:

³“Inn ah ka tlung lo ding ih, Ihkhun khal ah ka kai lo ding;

⁴Ka cawl lo dingih a ih khal ka it lo ding;

⁵Israel ih Pathian Cungnungbik hrangih hmun ka hmuh hlan lo le, BAWIPA hrangih umnak inn ka sak hlan ahcun,” a rak ti kha!

⁶Thukam Kuang thu cu Bethlehem in ka thei ih, Jearim ih lo sungah kan hmu zo.

⁷“BAWIPA ih innah feh uhsila, A siangpahrang tokham hmaiah kun in bia uhsi,” kan ti.

⁸Maw BAWIPA, na huham lang tertu na Thukam Kuang thawn, Na colhnak hmunah ra thlang awla, kumkhua in ra um aw.

⁹Na puithiam pawl cu dingnak thawn thuam-aw hai sehla, Rintlak na minung pawl cu lungawi in au hai seh.

¹⁰Na siahhlawh David hnenah thu na tiam zo; Maw BAWIPA, na hril ciami siangpahrang cu hnong hlah aw.

¹¹David hnenah siatcam in thu na tiam zo ih, Na la kir sal lo ding: “Na fapa pawl sungin pakhat cu, Siangpahrang ah ka tuah ding; Na aiah siangpahrang a si ding.

¹²Na fapa pawl in ka thukam an thlun ih, ka thupekmi pawl an ngai a si ahcun, Anmah ih fapa pawl khal na neh hnuah kumkhua in siangpahrang an ṭuan ding,” na rak ti kha!

¹³BAWIPA in Zion a hril zo; A umnak dingah a duh a si.

¹⁴“hittawk ah kumkhua in ka um ding; Ka umnak hrangah ka duh a si.

¹⁵Zion ih ṭulmi hmuahhmuah cu, Famkim zetin ka pe ko ding; A mi farah pawl ka cawm hai ding.

¹⁶A puithiam pawl cu, An hnaṭuannak kipah ka thlawsuah ding ih, A minung pawl cu lungawi in an au ding ih hla an sak ding.

¹⁷David ih tefa pakhat cu, Siangpahrang ka siter ding ih, Ka hrilmi siangpahrang ih uknak cu, hitawk ah ka hmunter ding.

¹⁸A ral pawl cu ningzahnak in tuam hai ding; Asinain anih uknak cu a kau sinsin dingih, a ṭhangso vivo ding a si,” a ti.