Read Falam Chin SAAM HLABU 14 Bible Online

SAAM HLABU 14 - Falam Chin bible

SAAM HLABU 14

¹[10] Mi aa cun a thinlung in, “Pathian a um lo,” a ti. Milai cu an siat ṭheh a si; Ningsinza thil tampi an tuah. Thil ṭha a tuahtu pakhat hman an um lo.

²Minung lakah fimnak a neitu le Pathian a hawl ih a biatu an um maw? ti theih duh ah, BAWIPA in minung pawl cu, Vancung ihsin a run zoh.

³Asinain an zatein an pial ṭheh; An thinlung sung tiangin a thu ṭheh a si. Zohman thilṭha tuahtu an um lo, Pakhatte hman an um lo.

⁴BAWIPA in, “Hi mi ṭha lo pawl hi theihthiamnak zianghman a nei lomi maw an si? saang an ei vekin ka minung pawl an ei baar ṭheh a si. Ka hnenah thla an cam fawn lo,” a ti.

⁵Asinain annih cu ṭih phang in an um ding; Ziangahtile a dingfelmi hnen lawngah Pathian cu a um.

⁶Mi lungnem ih khawkhannak cu nan siatsuah, Sikhalsehla annih ih beunak cu BAWIPA a si.

⁷Israel mi runnak cu Zion ihsin ra suak sehla ka va duh so! BAWIPA in a minung pawl mal a sawm sal tikah, Jakob ih tesinfa pawl cu an lung a awi ding ih Israel mi pawl cu an ai a puang ding.