Read Falam Chin SAAM HLABU 140 Bible Online

SAAM HLABU 140 - Falam Chin bible

SAAM HLABU 140

¹[100] Maw BAWIPA, mi ṭha lo pawl kut ihsin i hum aw; Mi puarthau pawl kut ihsin i run aw.

²Annih pawl cun ṭhat lonak lawng an hawl ih, Tawhawknak lawng an ngaihtuah.

³An lei cu rul cukhrang lei vekin a hriam, An ṭong cu rulngan ih tur vek a si.

⁴Maw BAWIPA, mi ṭha lo pawl kut ihsin i hum aw; Keimah thlak ding le thisen suah ding lawng a hiartu pawl ih kut ihsin i run aw.

⁵Mi hngalhngawng pawl in thang in kam; Palphum thang an siah ih, Keimah awk dingah lamzin tluan in thang an kam.

⁶BAWIPA hnenah, “Nangmah cu ka Pathian na si,” ka ti. Maw BAWIPA, bomnak dil ih ka aunak i ngai hram aw!

⁷Maw BAWIPA, ka Pathian le i humtu cak, Raldonak hmunah ka lu cu ralphaw thawn na hum ngah zo.

⁸Maw BAWIPA, mi ṭha lo pawl cu an duhmi pe hlah aw; Mi an phiarnak tla hlawhtlinter hram hlah aw.

⁹Ka ral pawl cu nehtu siter hlah aw; In hro siatnak cu an parah tla hram seh.

¹⁰A vaam zetmi meiling cu an parah tla hram seh; Khur sungah suak thei nawn lo dingin hlonmi si hai seh.

¹¹A dik loih midang sualpuhtu cu, hlawhtling hlah hai seh; Thisen suah a hiartu pawl cu, ṭhat lonak in man sehla siatsuah si hram hai seh.

¹²Maw BAWIPA, nang cun mi farah pawl ih thu le, Mi tlasam pawl ih covo cu na ṭan a si, ti ka thei.

¹³Miding pawl cun an lo thangṭhat zet ding; Miding cu na mithmuh ah an um ding a si.