Read Falam Chin SAAM HLABU 144 Bible Online

SAAM HLABU 144 - Falam Chin bible

SAAM HLABU 144

¹[104] Ka beunak lungpi BAWIPA cu thangṭhat uh! Raldo daan le ral nam zia cu, Amah in i zirh.

²Amah cu i humtu le ṭantu a si; Ka beunak le i runtu khal a si; Ka himnak ah amah ka ring. Miphun dang pawl cu ka hnuai ah a ret hai.

³Maw BAWIPA, milai hi ziangso a si ih na seherh ringring? Mihring taak ko hi ziangso a si ih, a zawn na ruah?

⁴Minung cu thaw vek fang a si; A nundam sung cu, A liam cingmi phenthlam vek a si.

⁵BAWIPA, van khi run ong awla rung lang aw; Tlang pawl khi tham awla meikhu an suah ding.

⁶Nimthla kauter awla na ral pawl ṭhekdarh hai aw. Na conkiang sai awla tlanter ṭheh hai aw!

⁷Tlun ihsin run dawh awla, Ti thuuk sung ihsin i dir suak in i run hram aw. Thudik a sim dah lo mi le,

⁸Siatcam in thuphan a pertu, Ram dangmi pawl ih kut sung ihsin i hum hram aw.

⁹Maw Pathian, na hnenah hla thar ka sak ding; ṭingṭang tum in hla ka lo sak sak ding.

¹⁰Siangpahrang pawl hnenah nehnak na pek ih, Na siahhlawh David cu na run suak a si.

¹¹Zaangfah nei lo ka ral pawl kut in i hum awla, Thudik a sim dah lo tu le, Siatcam in thuphan a reltu pawl, Ramdang mi ih kut sungin i run hram aw.

¹²Kan fapa pawl cu mino an si lai ihsin, ṭhazet le cakzet ih a ṭhangmi, Thingkung bangtuk si hai seh. Kan fanu pawl cu siangpahrang inn mawi tertu, Inn kilih phunmi lungser bangtuk si hai seh.

¹³Kan cuam pawl cu rawl phunkim in khat seh; Kan loram sungih tuu pawl cu, A thawng a saang in fano nei hai seh.

¹⁴Kan caw rual tla karhzai ciamco hai sehla, Hloral le fahrulh ti um hlah seh. Kan lamzin ah riahsia ninghang ih, ṭahnak awn-au um hlah seh.

¹⁵Cubangtuk a si mi ram cu ram thlawsuak a si; BAWIPA kha an Pathian ah a neitu miphun cu, mi thlawsuak phun an si.