Read Falam Chin SAAM HLABU 145 Bible Online

SAAM HLABU 145 - Falam Chin bible

SAAM HLABU 145

¹[105] Na maksak zia cu ka tlang aupi ding ka Pathian le siangpahrang; Kumkhua in kumkhua tiang na hnen ah lungawi thu ka sim ding.

²Nitinte ka lo lawm ding; Kumkhua cat loin ka lo thangṭhat ding.

³BAWIPA cu a tumlian ih, Nasa zetih thangṭhat ding a si. Maktara a si ih theih ban ding a si lo.

⁴Na thil tuahmi pawl cu sankhat hnu sankhat ah, Thangṭhat ringring a si ding. Mangbangza na tuahmi pawl cu an thanter ding.

⁵Minung in na sunlawinak le na huham an sim an rel ding ih, Mangbangza na tuahmi pawl cu Ka thinlung in ka ngaihtuah ringring ding.

⁶Thil maktara na tuahmi pawl cu mi in an sim ding ih, Kei in na tumlian zia ka phuang ding.

⁷Na ṭhat zia an rel ding ih, Zaangfahnak na neih zia hla in an sak ding.

⁸BAWIPA cu mi duhdawtu le mi zaangfahtu a si; A thinheng a har ih a hmunmi duhdawtnak in a khat.

⁹Mi hmuahhmuah parah a ṭha; A tuahmi hmuahhmuah tlunah lainatnak a nei.

¹⁰Maw BAWIPA, na seemsuahmi hmuahhmuah in, An lo thangṭhat ding ih, Na minung pawl in lungawi thu na hnenah an sim ding.

¹¹Na uknak sunlawi zia le na cah zia cu annih in an sim ding.

¹²Cuticun mi hmuahhmuah in mangbangza na tuahmi le, Na uknak huham sunglawi cu an thei ding.

¹³Na uknak cu kumkhua in a hmun; Nang cu kumkhua in siangpahrang na si. Pathian cu a thutiammi hmuahhmuah ah rinsantlak a si; A thil tuahmi hmuahhmuah ah zaangfahnak a nei.

¹⁴Harsatnak a tuartu hmuahhmuah a bawm ih, Mi lungnem hmuahhmuah a cawisaang a si.

¹⁵Nunnak neitu hmuahhmuah in, Beiseinak thawn nangmah an lo zoh. An ṭul tikah nang in rawl na pek hai a si.

¹⁶Khopkham in na pek hai ih A tum a seen ih ṭulmi hmuahhmuah na pek a si.

¹⁷BAWIPA cu a tuahmi kipah a ding; A tuahmi tin ah zaangfahnak a nei.

¹⁸BAWIPA cu amah a kotu ih kiangah a um ringring; Thinlung taktein a kotu ih kiang ah a um ringring a si.

¹⁹Amah a ṭihzahtu pawl ih poihai mi cu a pe, An aunak a thei ih a run hai a si.

²⁰Amah a duhtu hmuahhmuah a hum; Asinain mi ṭha lo hmuahhmuah cu a ti hloral ding.

²¹BAWIPA cu ka thangṭhat ringring ding; A seemsuahmi hmuahhmuah in a hmin thianghlim cu, Kumkhua in thangṭhat hai seh.