Read Falam Chin SAAM HLABU 147 Bible Online

SAAM HLABU 147 - Falam Chin bible

SAAM HLABU 147

¹BAWIPA cu thangṭhat uh! Kan Pathian hnenih, Thangṭhatnak hlasak cu a ṭha. Amah thangṭhat cu a nuammi le a dikmi a si.

²BAWIPA in Jerusalem cu a din sal; Saltaang Israel mi pawl a kirpi sal a si.

³Thinlung kuaimi pawl a damter ih, An hma pawl a tuam sak.

⁴BAWIPA in arsi um ding zat a khiah; Pakhat hnu pakhat an hmin ciar in a ko.

⁵Kan BAWIPA cu a nasa mi le a maksak mi a si; A thil theih theizia cu tah theih ding rual a si lo.

⁶Mi tangdor pawl cu a cawisaang; Asinain mi ṭha lo pawl cu, leilung ah a palcih hai a si.

⁷BAWIPA hnenah thangṭhatnak hla sak uh! Ṭingṭang thawn kan BAWIPA hnenah hla mawi sak uh.

⁸Van ah khin khawdur a pharh ih, Leilung hrangah ruah a surter. Cule tlangpar ah hrampi a khoter.

⁹Amah in ramsa pawl rawl a pe ih, Tlang-ak note pawl khal an ai tikah rawl in a cawm hai.

¹⁰A lungawinak cu rang cak zetzet parah a um lo; A thinnomnak khal ralkap ralṭha zetzet parah a um lo.

¹¹Asinain amah a ṭihzahtu le, A hmunmi a duhdawtnak a rinsantu pawl parah a um sawn a si.

¹²Maw Jerusalem, BAWIPA cu thangṭhat aw! Maw Zion, na Pathian cu thangṭhat aw!

¹³Amah in na kotka a hngetter ih, Na minung pawl thlawsuah a pek.

¹⁴Na ramri pawl a himter ih, sangvut ṭha bik in a lo cawm.

¹⁵Amah in leilung cu thu a pek ih, A thupekmi zamrang in tuah a si.

¹⁶Patpar bangin vur a tlakter; Vur tla cu leivut bangin a ṭhekdarh.

¹⁷Rial cu lungte hluum bangin a tlakter; A thlenter mi khawsik cu, zohman in an tuar thei lo.

¹⁸Thu a pek sal ih tikhal pawl an zup ṭheh; Thli a hranter ih tidai a luang.

¹⁹A thu cu Jakob hnenah a pek ih, A thu zirhmi le a daan pawl cu Israel a pek.

²⁰Hi bangtuk cun miphun dang hnenah a tuah lo; A daan pawl an thei lo a si. BAWIPA cu thangṭhat uh!