Read Falam Chin SAAM HLABU 148 Bible Online

SAAM HLABU 148 - Falam Chin bible

SAAM HLABU 148

¹BAWIPA cu thangṭhat uh! BAWIPA cu vancung in thangṭhat uh! Tlun hmun saang ah thangṭhat uh.

²A vancungmi hmuahhmuah in amah thangṭhat uh; A van ralkap hmuahhmuah tla in!

³Ni le thlapi tla, amah thangṭhat uh! A tleumi arsi pawl tla, amah thangṭhat uh!

⁴Vancung saang bik pawl le, Van tlunih tidai pawl khal in amah thangṭhat uh!

⁵An zate in BAWIPA hmin thangṭhat hai seh; Amah in thu a pek ih seemsuah an si.

⁶A thupeknak in an hmun ciar ah, Kumkhua in an hmun; A thu an el thei lo.

⁷Leilung ihsin BAWIPA cu thangṭhat uh! Tipi sungih ramsa tumpipi, tipi thuuk in,

⁸Nimthlakau, rial, vur, Khawdur le thlisia pawl, A thu a ngaitu hmuahhmuah in thangṭhat uh!

⁹Tlangniam le tlangsaang in amah thangṭhat uh! Rah a rahmi thingkung le tupi thingkung pawl in;

¹⁰Inn zuat ṭilva, hramlak ramsa, Vate pawl le a bokvakmi ramsa pawl khal in, BAWIPA cu thangṭhat uh!

¹¹Siangpahrang pawl le miphun kip, BAWIPA cu thangṭhat uh! Bawi le uktu pawl hmuahhmuah in,

¹²Fala le tlangval pawl khal in, Nutar patar le nauhak pawl tla in, BAWIPA cu thangṭhat uh.

¹³An zate in BAWIPA ih hmin cu thangṭhat hai seh. A hmin cu hmin dang hmuahhmuah hnakin a nasa sawn a si. A sunlawinak cu lei le van tlun ah a thang.

¹⁴A minung pawl ih ram cu a cakter, Cuticun a ngainatmi Israel miphun, Amah ih minung hmuahhmuah cun an thangṭhat ding. BAWIPA cu thangṭhat uh!