Read Falam Chin SAAM HLABU 16 Bible Online

SAAM HLABU 16 - Falam Chin bible

SAAM HLABU 16

¹[12] Maw Pathian, kei i hum hram aw; Ziangahtile nang cu ka beunak na si ih ka lo rinsan.

²BAWIPA ih hnenah, “Nangmah cu ka Bawipa na si ih, Nangmah locun ṭhatnak zianghman ka nei lo,” ka ti.

³BAWIPA ih mi thiang pawl cu ziangtluk in so an mawi! Anmah thawn um cu ka lungawinak bik a si.

⁴Khawzing dangdang hnenih a tlan rerotu pawl cu Anmahte vansaannak an pe aw a si. An raithawinak ah ka tel lo ding; An khawzing pawl ih hmin tla ka hmur in ka sal lo ding.

⁵Maw BAWIPA, nangmah cu ka ro le ka covo na si; Ka hai mi hmuahhmuah nangmah in i pek. Ka nunnak cu na kut sungah a um.

⁶Ramri i tuahsakmi cu ziangtluk in so an mawi! Ka hrangah ro sunglawi an si.

⁷Rem i ruahsaktu BAWIPA cu ka thangṭhat; Zan khalah ka thinlung in ralrinnak i pek.

⁸Ka hnenih BAWIPA a um cu ka thei ringring; Ka vorhlam ih a um ruangah, Zianghman in i hnin thei lo ding.

⁹Curuangah lungawinak le thinnomnak in ka khat; Ka hna a ngam ringring a si.

¹⁰Ziangahtile mithi khua ahcun i fehter siang lo ding ih, Nangmah a lo rinsantu cu khur sungah cun na tanta lo ding.

¹¹Nangmah in nunnak lamzin cu i hmuh ding; Na umnak ah lungawinak a kim ih, Na ban thacak ah nomnak kumkhua in a um.