Read Falam Chin SAAM HLABU 17 Bible Online

SAAM HLABU 17 - Falam Chin bible

SAAM HLABU 17

¹[13] Maw BAWIPA, dingfelnak hrangih Ka thlacamnak hi ngai hram aw. Bomnak dil ih ka aunak cu ruat hram aw. Ka thlacamnak cu thei hram aw; Bum hmang lo ka hmurka ih thla ka camnak hi!

²Thudik na theih ruangah Keimah ṭan in thu na ṭhen ko ding.

³Nangmah in ka thinlung na thei; Zan ah i rung veh ih, I hlathlai thluh hmanah, ka sungah ṭhat lonak zianghman na hmu lo. Ka hmurka in ṭongsia ka ṭong lo.

⁴Midang ih tuah vek cun ka tuah lo, Na thukham ka thlun ih Mi nunsia pawl ih lamzin ka thlun lo.

⁵Na lamzin ah ka feh ringring ih Ziangtik hmanah ka bah dah lo.

⁶Maw Pathian, thla ka cam tikah Nang cun i run let ringring. Atu khalah na hna i tun awla Ka thu hi i theihsak aw.

⁷Maw in Runtu, na duhdawtnak mangbangza cu run langter hram aw. Na kiangih a um hmuahhmuah cu ral pawl ih kut in an him a si.

⁸Na mitmu na kilven vekin i kilveng hram aw; Na thladem thuaiah i thup hram aw;

⁹Mi ṭha lo pawl in in do ih, Mithah hiar ka ral pawl in in kulh ṭheh a si.

¹⁰Zaangfahnak zianghman nei loin, Puarthau zetin an ṭong.

¹¹Ka fehnak kip in zawt ih in kulh ṭheh, Dirthlu dingah caan ṭha lawng an bawh.

¹²Kiosa vek an si ih bauhthlek thluh lawng in tum. Kiosa no vekin an kua ihsin in bawh a si.

¹³Maw BAWIPA, tho awla ka ral pawl cu do in neh hai aw. Ka nunnak hi mi ṭha lo pawl kut ihsin na ralnam thawn i hum aw.

¹⁴Maw BAWIPA, na ban thacak in i hum hram aw, Leitlun covo lawng a neimi pawl kut sung ihsin. An hrangih na khawl ciami hremnak in hrem hai aw, An faale hrangah hremnak um sehla, An tesinfa pawl hrang tla ah taang hrih seh.

¹⁵Asinain kei cun dingnak thawn na hmai ka hmu ding; Ka ṭhangharh tikah na mithmai ka hmu ding ih, Ka lungawinak a kim ding.