Read Falam Chin SAAM HLABU 18 Bible Online

SAAM HLABU 18 - Falam Chin bible

SAAM HLABU 18

¹[14] Maw BAWIPA, ziangtluk in so ka lo duh! Nang cu ka cahnak na si.

²BAWIPA cu ka lungpi, ka ralhruang le i runtu a si. Ka Pathian cu ka beunak lungpi, ka ralphaw le ka rundam cahnak a si; Amah sungah cun ka him.

³Thangṭhat tlak BAWIPA cu ka ko ih, Ka ral pawl kut sung ihsin i luatter.

⁴Thihnak hrihrual in i ngerh ih Siatnak tilian in i khuh.

⁵Sheol hridai in i awk ih Thlaan in thang i kam.

⁶Harsat ka ton laiah BAWIPA cu ka ko; I bawm dingah ka Pathian cu ka ko a si. A biakinn ihsin ka aw a thei; Ka aunak aw a hna sungah a lut.

⁷Pathian a thin a heng ruangah Leilung cu a hnin ih a thir, Tlang pawl ih hram ṭoh-nak tla cu An khur ih an ṭhia thlohthlo.

⁸A hnarkua in meikhu a suak ih, A kaa ihsin meihlio le meivam a suak zukzo.

⁹Van a caihkuur ih a rung ṭum, Khawdur sahzet a ke hnuai ah a um.

¹⁰Cherub parah to in a rung zam; Thli ih thla parah to in zamrang tein a ra.

¹¹Khawthim in a tuam aw; Tidai in a khatmi mero sahzet a kimvel ah a um.

¹²A hmaiih nimthlakau tle sungin Rial le meivam an rung tla ih Khawdur sahzet cu a run pah suak.

¹³Cule BAWIPA cu van ihsin khawri bangin a ri durdo; Cungnungbik in a aw a suah.

¹⁴A conkiang a sai ih a ral pawl a ṭhio ṭheh; A nimthla a kauter ih a tlanter ṭheh hai a si.

¹⁵Maw BAWIPA, na thinheng in na ral pawl na kawk ih na huuk ciamco tikah cun, Tipi thuanthum ih tawne a lang ih Leilung ih hramṭohnak tla an lang ṭheh a si.

¹⁶BAWIPA in tlun ih van ihsin i run dawh ih i run kai; Tithukpi sung ihsin i dirh suak.

¹⁷A cakzetmi ka ral pawl ih kut sungin i suah; I huatu le ka hrangih a cak tukmi kut sungin.

¹⁸Ka vanduai ni ah annih in in do; Asinain BAWIPA in i hum.

¹⁹Ṭihphannak ihsin himnak hmun kaupi ah i suah; Ka parih a lung a awi ruangah i run.

²⁰A dikmi ka tuah ruangah BAWIPA in laksawng i pek; Ka kut a thianhlim vekin i lehrul a si.

²¹BAWIPA ih lamzin cu ka zawh; Ka Pathian hnen ihsin hlothlau zetin ka tlansuak dah lo.

²²A daan hmuahhmuah ka hmai ah an um ringring ih, A thupekmi pakhatte hman ka hnong dah lo.

²³A hmaiah mawh nei lo ka si ih Sual phuhrunawknak ihsin hlimphirte in ka um zo.

²⁴Dingfelte ih ka um ruangah laksawng i pek; A mithmuh ih ka kut a thianhlim vekin i lehrul a si.

²⁵Maw BAWIPA, rintlakmi hnenah rintlak in na lang ih, Mawh neilo mi hnenah mawh nei lo in na lang.

²⁶Mi thianghlim hnenah thianghlim in na lang, Sikhalsehla mi khermei hrangah cun na khermei ve a si.

²⁷Mi tangdor pawl cu na run suak ṭheu, Asinain mi hngal pawl cu na nam thlak a si.

²⁸Maw BAWIPA, nangmah in ka mei-inn na vang ih, Ka Pathian, nangmah in ka thimnak tla na tleuter.

²⁹Ka ral pawl do theinak ah le An ṭannak hruang pawl lan thei nakah thazaang ṭha i pek.

³⁰Hi Pathian ih lamzin cu a famkim a si; BAWIPA ih thutiamnak cu rintlak a si! A hnenih beunak a hawltu hrangah Amah cu ralphaw a si.

³¹BAWIPA siar lo Pathian dang zoso a um? Kan Pathian hlei ah lungpi dang a um mawsi?

³²Amah cu i caktertu Pathian a si ih, Ka lamzin khalah himnak a umter.

³³Zukneng bangin ka ke zuan a zaangter ih, A saannak hmun ah himte in i umter.

³⁴Dar ih tuahmi li hman nawp thei dingah, Amah in ral do i zirh a si.

³⁵Maw BAWIPA, nangmah in na rundamnak phaw i pek; Na vorhlam kut in i kaifek ih, Na nunneemnak in i tumlianter.

³⁶Ka fehnak lamzin na kauter ih, Ka rilbah dah lo.

³⁷Ka ral pawl ka dawi ih ka man hai a si; Ka siatsuah ṭheh hlan lo ka kir lo.

³⁸Ka saat hai ih an tho thei nawn lo; Ka kehram ah an ril.

³⁹Nangmah in hi raldonak ah thazaang i pek ih, Ka ral pawl cu ka hnuai ah an tlu ṭheh.

⁴⁰Ka hnen ihsin ka ral pawl cu na tlanter ih, I huatu hmuahhmuah ka siatsuah ṭheh a si.

⁴¹Bomnak dil in an au, Asinain zohman in an run hai lo. BAWIPA ih hnenah an au, Asinain a sawn hai lo.

⁴²Ka deengcip vivo hai ih, Thli ih semmi leivut vekah an cang. Ka palcih vivo hai ih, Lamzin ih ciarbek vekah an cang.

⁴³Dodal hmang miphun sung in i run ih, Miphun tampi uktu ah i tuah. Ka theih dah lomi pawl cu i riantu ah an cang.

⁴⁴Ka thuhla an theih cun ka thu an thlun; Ramdang mi tla ka hmaiah kun in an ra.

⁴⁵Annih tla cu an thin a phang ih An ralhruang sung ihsin ṭhia thlohthlo in an ra suak.

⁴⁶BAWIPA cu a nung a si! Ka ṭannak lungpi cu thangṭhat si ko seh. Ka rundamnak Pathian cu hlorh in um seh.

⁴⁷Phuba i laksaktu amah a si ih, Mi hmuahhmuah ka ke thuaiah a ret.

⁴⁸I raltu pawl ih kut ihsin i runsuak. Maw BAWIPA, ka ral pawl ih tlunah i khaisaang; Mi suaksual pawl lakin i runsuak.

⁴⁹Curuangah maw BAWIPA, miphun tampi lakah ka lo lawm ding; Na hmin thangṭhatnak hla in ka sak ding.

⁵⁰Pathian in a siangpahrang hnenah nehnak tumpi a pek; Hriak a culh zomi David le a tesinfa hnenah kumkhua in A hmunmi a duhdawtnak cu A langter ringring a si.