Read Falam Chin SAAM HLABU 19 Bible Online

SAAM HLABU 19 - Falam Chin bible

SAAM HLABU 19

¹Van pawl khin Pathian sunlawinak an sim ih, Tlolak kaupi cun a kutsuak an langter.

²Sun in sun hnenah thu a sim ih, Zan in zan hnenah theihnak a thlenter.

³Ṭong an hmang lo, aw khal an suah lo; Thawmvang zianghman theih a si lo.

⁴Asinain an aw cu leilung khua zakip ah a thang; An thuthanmi cu vanhram deng a thleng. Van ahl khin Pathian in ni hrangah puanthlam a zar sak;

⁵Ni cu a inn ihsin mo neitu tlangval pa bangin a rung suak, Tlan zuamnak ih a teltu tlangval ṭha bangin.

⁶Khatlam vanhram dengin a thok ih, Khatlam deng tiang a heel ih a tlan. A satnak ihsin zohman a relh theitu an um lo.

⁷BAWIPA ih daan cu a famkim, Nunnak thartertu a si. BAWIPA ih thupek mi pawl cu rintlak an si, A fim lomi fimnak petu a si.

⁸BAWIPA ih daan pawl cu a dikzet, A thluntu hrangah lungawinak a si. A thukham pawl cu a dikzet, Thinlung mit vaangtertu a si.

⁹BAWIPA ṭihzah cu a thiangfai, Kumkhua in a hmun ringring. BAWIPA ih thu ṭhennak cu a dik, Ziangtik khalah a dik a si.

¹⁰Sui hnakin duh a um sawn, Sui ṭha bik hnak khal in. Khuaitizu hnakin a thlum sawn, Khuaithlar ihsin a formi khuaitizu hnak khal in.

¹¹Na siahhlawh i fimtertu a si, Na daan thlun cu hlawknak tumpi a si.

¹²Mah ih palhnak a thei theitu zoso a um? Thupte mawhnak in i thiangter aw.

¹³Tumhrim sualnak khal in i hum awla, I uktu ah cang hram hlah hai seh. Cuticun mi famkim ka si ding ih Tuksumza sualnak in ka luat ding.

¹⁴Ka hmur in a suakmi ṭongkam le Ka thinlung ih khawruahnak tla hi, Maw BAWIPA, na hmaiah cotlak si hram seh; Ka beunak lungpi le i runtu.