Read Falam Chin SAAM HLABU 21 Bible Online

SAAM HLABU 21 - Falam Chin bible

SAAM HLABU 21

¹[16] Maw BAWIPA, siangpahrang cu na cahnak ah a lung a awi. Nehtu na siter ruangah lungawinak in a khat.

²A lungthlitum na pek zo; A lo dilmi hmuahhmuah na el lo.

³A hnenah malsawmnak a phunphun thawn na ra ih, A lu parah sui lukhuh na khumter.

⁴Nunnak a lo dil ih na pe zo, Kumkhua tlaitluan ih damnak cu!

⁵Na bawm ruangah a sunlawinak a tum, Lennak le hminthannak na pe.

⁶Na thluasuah cu a parah kumkhua in a hmun, Na umpi ruangah lungawinak in a khat.

⁷Siangpahrang in Cungnungbik BAWIPA a rinsan; A thleng-aw dah lomi BAWIPA ih duhdawtnak ruangah, Anih cu hnial thei loin siangpahrang a si ding.

⁸Na ral hmuahhmuah na kut cak in na kai ding; A lo huatu hmuahhmuah tla na kai ṭheh ding.

⁹Na lang tikah annih pawl cu Somei vaam bangin na ur thluh hai ding. BAWIPA in a thinhengin a dolh thluh hai ding ih, Meisa in a kangral ṭheh ding.

¹⁰Siangpahrang in an faale pawl an ci a hmit ding ih, An tesinfa pawl tla a ṭhiam thluh hai ding.

¹¹Thil ṭha lo an ngaihtuah ih an phiar khalle, An hlawhtling lo ding.

¹²A conkiang in a sai hai ding ih An pet an zuang ciamco ding.

¹³Maw BAWIPA, na cahnak hi hlorh in um-aw sehla, Na thilti theinak cu hla in kan cawimawi ding.