Read Falam Chin SAAM HLABU 22 Bible Online

SAAM HLABU 22 - Falam Chin bible

SAAM HLABU 22

¹[17] Ka Pathian, ka Pathian, Ziangah so i tlansan? Bomnak dil in ka au rero laiah, Ziangah so hlapi ih i um san?

²Maw ka Pathian, sun ah ka lo ko, Asinain i awi lo. Zan khal ah ka au rero naón Colhdamnak ka ngah cuang lo.

³Sikhalsehla nang cu siangpahrang tokham parah, Thianghlim bik in na to; Israel mi in hla ih thangṭhatmi na si.

⁴Kan pupa pawl in nangmah an lo rinsan; An lo rinsan ih na run hai a si.

⁵Nangmah an lo ko ih ṭihphannak in an luat; An lo rinsan ih an mualpho lo.

⁶Asinain kei cu milai ka si nawn lo, cangcel ka si ko; Mi hmuahhmuah ih hmuhsuammi le nautatmi ka si.

⁷I hmutu hmuahhmuah in hnihsuahsainak ah in hmang; An lei in khaak ih an mit in phen.

⁸“BAWIPA na rinsan a sisi; Ziangah so a lo run lo? BAWIPA in a lo duh asile, Ziangah so a lo bom lo?” in ti.

⁹Ka nu ih pum sung ihsin damte in i suah tertu cu nangmah na si; Ka nu ih hnawi ka fawh lai khalah Himteih i kilkhawitu cu nangmah na si.

¹⁰Ka suah vete in nangmah ka lo rinsan; Ka suah ihsin nangmah cu ka Pathian na si.

¹¹Ka hnen ihsin feh hram hlah aw; Harsatnak ka kiang a thleng, Zohman bawmtu ka nei lo.

¹²Ral tampi in cawcang bangin in kulh; Ka kiangkap ah an um ṭheh. Bashan ramih cawcang hee vek an si.

¹³Kiosa vekin an kaa an ang; An huuk ih bauhthlek thluh in tum.

¹⁴Ka tha a cem, Leiro parih tidai thletmi vekin, Ka tha a poih ṭheh a si. Ka ruh pawl an pelh thluh zo; Ka thinlung cu meisa kiangih khuailul vekin, Ka sungah a zup thluh a si.

¹⁵Ka dang cu peibung vekin a caar ih, Ka lei cu ka saangkhar ah a erh aw a si. Nang in a thi zo ah i ruat ih leivut lakah i taanta.

¹⁶Uico pawl cu ka kiangah an um. Mi ṭha lo pawl in in kulh ṭheh; Ka kut le ka ke pawl an suntlang ṭheh a si.

¹⁷Ka ruh pawl an lang thluh, Ka ral pawl cun in zoh ih in diriam ngaingai.

¹⁸Ka hnipuan pawl an ṭhen aw ih, Ka korfual ngah dingah camcawh fung an zuuk.

¹⁹Maw BAWIPA, ka hnen ihsin tlan hram hlah aw! I Runtu, zamrang in ra awla i ra bawm aw!

²⁰Ralnam ihsin i run awla; Ka nunnak cu hi uico pawl sungin in hum hram aw!

²¹Hi kiosa pawl kaa sungin i suah aw; A hee zetmi cawcang pawl ki ihsin i runsuak zo.

²²Na tuahmi hmuahhmuah hi ka miphun hnenah ka sim ding; An tonkhawmnak ah ka lo thangṭhat ding:

²³“Amah cu thangṭhat uh, nannih BAWIPA ih siahhlawh pawl; Amah cu upat uh, nannih Jakob ih tefa sin pawl; Amah cu bia uh, nannih Israel mi pawl;

²⁴Mi farah a thlauthla lo ih Mi zonzai pawl tuarnak tla a umsan meen lo. Annih pawl a dungtun lo. Asinain bomnak dil ih an au tikah A awi hai a si,” tiah ka ti ding.

²⁵Na thil tuahmi ruangah hin An pumkhawmnak thupi ah ka lo thangṭhat ding. Thawinak pe dingih ka rak lo kam cia zo bangin, A lo ṭihzahtu pawl hmai ah ka pe ding.

²⁶Mi farah pawl in an duhzat in an ei ding; BAWIPA hnenih a rami pawl in amah an thangṭhat ding. Lungawi aipuang in um ringring hram hai seh.

²⁷Miphun hmuahhmuah in BAWIPA cu an thei sal ding ih, Vanrang deng khal in a hnenah an kir ding. Citin le hnamtin in amah an bia ding.

²⁸BAWIPA cu siangpahrang a si; Miphun hmuahhmuah a uk hai a si.

²⁹Mi hngal le mi neinung pawl a hmai ah an bok ding; A thi theimi milai hmuahhmuah a hmai ah an kun ding; Mahte a nung awter thei lotu pawl cu.

³⁰An tesinfa pawl in BAWIPA ih hna an ṭuan ding; A ra dingmi san khalah BAWIPA ih thu cu an sim ding.

³¹A suak lai dingmi pawl hnen khal ah, “BAWIPA in a minung pawl a run a si,” tiah an sim ding.