Read Falam Chin SAAM HLABU 24 Bible Online

SAAM HLABU 24 - Falam Chin bible

SAAM HLABU 24

¹[19] Leilung pumpi le a sungih ummi hmuahhmuah cu, BAWIPA ih ta an si. Leilung le a parih ummi tla Amah ih ta an si.

²Ziangahtile ti thukpi parah Leilungpi cu a dinter ih, A hram cu tipi thuanthum ih tawne ah a phun.

³BAWIPA ih tlang ah zoso a kai ding? A biakinn thiang sungah zoso a lut ding?

⁴A tuahnak le a ruahnak a thianghlim mi, Milem a bia lomi le Thuphan a per lomi a si ding.

⁵Amah cu BAWIPA in thluasuah a pe ding ih a run ding; Pathian in, “Mawh nei lo na si,” a ti ding.

⁶Pathian hnenih a rami cu cubangtuk an si; Jakob ih Pathian mithmai a hawltu pawl cu!

⁷Maw kotkhar pawl, rak khaisaang aw uh; Maw kumkhua sangka pawl, khaisaang aw uh; A sunglawimi siangpahrang a lut ding.

⁸A sunglawimi siangpahrang cu zoso a si? A cakmi le a nasa zetmi BAWIPA, Raldonak ih mi nehtu BAWIPA a si.

⁹Maw kotkhar pawl, rak khaisaang aw uh; Maw kumkhua sangka pawl, khaisaang aw uh; A sunglawimi siangpahrang a lut ding.

¹⁰A sunglawimi siangpahrang cu zoso a si? Amah cu mi hmuahhmuahih BAWIPA, Sunloih mi siangpahrang a si.