Read Falam Chin SAAM HLABU 25 Bible Online

SAAM HLABU 25 - Falam Chin bible

SAAM HLABU 25

¹[20] Maw BAWIPA, ka nunnak ka lo hlan;

²Ka Pathian, nangmah ka lo ring, Mualpho ningzahnak ihsin i luatter hram aw; Ka ral pawl cu ka parah an di riam hlah hai seh.

³Nangmah a lo ringtu cu an ning a zak dah lo; Nangmah a lo phiartu cu mualpho in um hai seh.

⁴Maw BAWIPA, na lamzin i zirh aw; Na lamzin cu i theihter hram aw.

⁵Na thudik vekih nung dingah i zirh aw; Ziangahtile nangmah cu i Runtu na si; Sunvute nangmah ka lo hngak!

⁶Maw BAWIPA, khuahlan lai ihsin na rak langtermi, Na mi zaangfahnak le a thleng-aw dah lomi na mi duhdawtnak cu, vun ruat sal hram aw.

⁷Ka no laiih ka mawhnak le ka thil tisualmi pawl I ngaidam hram aw. A thleng-aw dah lomi na duhdawtnak le na ṭhatnak ruangah, Maw BAWIPA, kei hi i hngilh hram hlah aw.

⁸BAWIPA cu a dik ih a ṭha; Misual pawl lamzin ṭha a zirh.

⁹Mi tangdor pawl cu lamzin dik ah a hruai ih, Mi lungnem pawl cu a lamzin a zirh hai a si.

¹⁰A thukham le a thupekmi a thluntu pawl cu, A duhdawtnak le rintlak a sinak thawn a hruai hai a si.

¹¹Maw BAWIPA, na hmin ih vaangah, A besia zetmi ka sualnak cu i ngaidam hram aw.

¹²BAWIPA a ṭihzahtu cu zoso an si? An thlun dingmi lamzin Pathian ih zirhmi pawl an si.

¹³Annih cu mi neinungzet an si ringring ding ih, An faale pawl khal himdam zetin An ram an luah ding.

¹⁴BAWIPA cu a thu a thluntu pawl ih rualpi a si, A thukam a theihter hai a si.

¹⁵Bomnak duh ah BAWIPA cu ka zoh ringring, Cule thang sung ihsin i luatter.

¹⁶Maw BAWIPA, i hoih awla i zaangfah hram aw; Ziangahtile ka lung a leeng ih ka tha a nau.

¹⁷Ka thinlung donharnak zatein in i sawng awla, Ka harnak sung in i run hram aw.

¹⁸Ka harsatnak le ka tuarnak hi i theihsak awla; Ka sualnak hmuahhmuah i ngaidam hram aw.

¹⁹Ka ral pawl hi zohhnik aw! Ziangtluk in so an tam ih, Ziangtluk lawmmam in so in huat!

²⁰I hum awla i run hram aw; Ningzahnak in i luatter hram aw; Beunak duh ah na hnenah ka ra.

²¹Ka ruahsannak na hnenih a um ruangah, maw BAWIPA, ṭhatnak le felnak in i himter hram seh.

²²Maw Pathian, na minung Israel mi pawl hi, An harsatnak hmuahhmuah sung ihsin luatter hram aw.