Read Falam Chin SAAM HLABU 26 Bible Online

SAAM HLABU 26 - Falam Chin bible

SAAM HLABU 26

¹[21] Maw BAWIPA, mawh neilo a si, tiah i ti hram aw; Ziangahtile a dikmi ka tuah ih, Ka thinlung zatein nangmah ka lo ring a si.

²Maw BAWIPA, i zingzoi awla i hniksak hnik aw; Ka duhnak le ka ruahnak khal hi khingkhai hnik aw.

³A thleng-aw dah lomi na duhdawtnak in i kil ih, Rintlak na sinak in i hruai ringring.

⁴Mi hlothlau pawl cu ka kom hai lo ih, Mi ti-awter pawl hnen khal ah ka tel lo.

⁵Mi hrokhrawl pawl hnenih tel cu ka hua ih, Mi ṭha lo pawl cu ka hrial hai a si.

⁶Maw BAWIPA, mawh neilo ka si langternak ah ka kut ka kholh ih, Nangmah bia phah in na biakṭheng cu ka heel.

⁷Nangmah hnenah lungawinak hla ka sak ih, Mangbangza na thil tuahmi pawl thu ka sim.

⁸Maw BAWIPA, na umnak inn cu ka ngaina, Na huham a umnak hmun cu!

⁹Misual pawl lakah i siatter ve hlah awla, Laithat pawl thawn khal i hloralter hram hlah aw.

¹⁰Annih cu cat loin sualnak thil ṭha lo a tuahtu le, Nawhthuh a la ringringtu an si.

¹¹Asinain kei cu thildik a tuahtu ka si; I zaangfah awla i hum hram aw.

¹²Ṭihphannak hmun ihsin hmun rawnpi ka thleng zo; Mi zapi khawmnak hmunah BAWIPA Ka thangṭhat ding.