Read Falam Chin SAAM HLABU 27 Bible Online

SAAM HLABU 27 - Falam Chin bible

SAAM HLABU 27

¹[22] BAWIPA cu ka tleunak le ka rundamnak a si; Zoso ka ṭih ding? BAWIPA cu ka beunak lungpi a si; Zianghman ka ṭih lo ding.

²Mi ṭha lo ka ral pawl in in do ih a thah in tum tikah, Anmah riangri an bah ih an ril.

³Ralkap burpi ih in kulh ṭheh hmanah, ka ṭih lo ding; Ka ral pawl ih in nor ciamco hmanah, thlaphang loin, Pathian cu ka rinsan thotho ding.

⁴BAWIPA hnenah thil pakhat ka dil; Cuih thil pakhat lawng cu ka duhmi a si: BAWIPA ih inn sungah ka nun sung hmuahhmuah um ka duh; A mawinak zoh dingah le amah ih duhmi hawl ding, hi a si.

⁵Harsat caanah amah ih puuk sungah i thup ding; A Biakinnpi sungah himte in i kilkhawi ding ih, A saangmi lungpi parah hnangamte in i umter ding.

⁶Cuticun ka kiang ih a ummi ka ral pawl cu ka neh ding. Lungawinak thawn au phah in a Biakinnpi sungah thawinak ka pe ding. Hla ka sak ding, BAWIPA cu ka thangṭhat ding.

⁷Maw BAWIPA, ka lo kawh tikah i thei hram aw; I zaangfah awla i let hram aw.

⁸“Ra awla Bawipa ih mithmai hawl aw,” na ti tikah, “BAWIPA, na mithmai ka hawl ding,” tiah ka ti.

⁹Na mithmai i hersan hram hlah aw. Ka parah na thinheng loin, Na siahhlawh hi i khir hram hlah aw. Nangmah cu i bawmtu ringring na si. Maw Pathian, I Runtu, I taanta hlah awla i dungtun hram hlah aw.

¹⁰Ka nu le ka pa cun in dungtun hman hai sehla, BAWIPA cun ṭhatein i tuam hlawm ding.

¹¹Maw BAWIPA, tuahter i duh mi cu i zirh awla, A dingmi lamzin ah i hruai aw. Ziangahtile ka ral an tam ngaingai a si.

¹²Thuphan le hro-nak hlir in i dotu ka ral pawl hnenah cun, i taanta hram hlah aw.

¹³A nungmi pawl ih ram ah BAWIPA ih ṭhatnak cu Ka hmu tengteng ding tiah ka zum.

¹⁴BAWIPA cu hngak uh; Cakzet le ralṭha in um uh; BAWIPA cu hngak uh.