Read Falam Chin SAAM HLABU 28 Bible Online

SAAM HLABU 28 - Falam Chin bible

SAAM HLABU 28

¹[23] Maw BAWIPA, ka Lungpi, Nangmah ka lo ko. Ka aunak aw i thei hram aw! Daiziar ih i umsan a si ahcun, Mithi khua ih a fehmi lakah ka tel ding.

²Bomnak dil in ka lo ko; Na Biakinnpi thianghlim lam ban phar in ka hoi tikah, Ka aunak aw i theih sak hram aw.

³Siatnak hlir a tuahtu pawl le An ṭongkam cu a thlum naón An thinlung huatnak ih a khatmi, Mi ṭha lo pawl hnenah i hnong hram hlah aw.

⁴An thil tuahmi, thilsual an tuahmi vekin lehrul hai aw; An hnaṭuanmi, an kutih an ṭuan sualmi vekin hrem hai aw.

⁵BAWIPA ih hnaṭuanmi le a kutih a tuahmi pawl cu ziang hmanah an siar lo. Curuangah siatbal hai awla, Ziangtik hmanah an tho sal nawn lo ding.

⁶BAWIPA hnenah thangṭhatnak pe uh; Zaangfah ka dilnak aw a thei zo.

⁷BAWIPA cu ka thazaang le ka ralphaw a si, Amah ka rinsan. I bom ruangah ka lung a awi. Amah cawimawinak cu hla in ka sak.

⁸BAWIPA in a minung pawl a hum. A hrilmi siangpahrang cu a ṭan ih a run.

⁹Maw BAWIPA, na minung pawl hum awla, Na ta a si mi pawl cu thlawsuah pe hai aw. Anmah khaaltu si awla, Kumkhua in kilkhawi hai aw.