Read Falam Chin SAAM HLABU 29 Bible Online

SAAM HLABU 29 - Falam Chin bible

SAAM HLABU 29

¹[24] Maw vanmi pawl, BAWIPA cu thangṭhat uh; A sunlawinak le a cahnak cu thangṭhat uh.

²BAWIPA ih hmin sunglawi cu thangṭhat uh; A sunlawinak thawn a lang tikah Thianghlim bik hmai ah kun uh.

³BAWIPA ih aw cu tifinriat parah a thang; Sunglawi bik Pathian cu khawri bangin a ri durdo. A aw cu tipithuanthum parah a khawk ruangro.

⁴BAWIPA ih aw cu huham a nei zet ih a nasa ngaingai.

⁵BAWIPA ih aw in sidar thingkung a khiak, Lebanon ih sidar thingkung tiangin a khiak thluh.

⁶Amah in Lebanon tlang pawl cu, cawte turcaai bangin a khirter ih, Hermon Tlang cu sele note bangin a petter.

⁷BAWIPA ih aw in nimthla a kauter.

⁸A aw in nelrawn a hninter, Kadesh ih nelrawn khal cu.

⁹BAWIPA ih aw in zukneng pinu ih fa a suakter; Thingkung pawl tla an hnah a kolhter ṭheh. Cule a Biakinn sungah, “Pathian cu sunglawi seh,” tiah an au.

¹⁰BAWIPA in tipi thuk pawl a uk; Siangpahrang a si ih kumkhua in a uk a si.

¹¹BAWIPA in a minung pawl cu thazaang cahnak a pek; Hnangamnak thawn a thlawsuah hai a si.