Read Falam Chin SAAM HLABU 31 Bible Online

SAAM HLABU 31 - Falam Chin bible

SAAM HLABU 31

¹[26] Maw BAWIPA, na hnenah beunak hawl in ka ra; Ningzak in i umter hlah aw. Nang cu a dingmi Pathian na si ruangah I run hram aw.

²Ka lo dilnak aw thei in zamrang tein i run hram aw. Ka beunak si awla i hum hram aw; I ṭantu si awla i run hram aw.

³Nang cu ka beunak lungpi le ka ralhruang na si. I tiam cia vekin i kil awla i hruai hram aw.

⁴Ka hrangih an kam ciami thang ihsin i luatter hram aw. Nang cu ka beunak na si.

⁵Ka nunnak cu na kut sungah ka lo hlan. Maw BAWIPA, i hum hram aw; Nang cu rintlak Pathian na si.

⁶Santlai lo milem a biatu pawl cu na hua. Asinain kei cun nang ka lo rinsan.

⁷A hmunmi na duhdawtnak ruangah Ka lung a awi ding ih ka ai a puang ding. Ka tuar zia na hmu ih ka harsat zia na thei.

⁸Ka ral pawl ih kut sungah i thlengter lo. Ka duhnakah luatzet in ka feh.

⁹Maw BAWIPA, ka parah zaangfahnak nei hram aw. Vansang in ka um a si. Ka ṭahnak ah ka mit a cuur ṭheh; Ka tha khal a cem ṭheh zo.

¹⁰Riahsiatnak ruangah ka nun a tawi ih, Ka ṭahnak in ka kum a ralter. Ka zonzai tuk ih ka taksa khal in a daih lo. Ka ruh tiangin an rop a si.

¹¹Ka ral pawl in capoh-nakah in hmang; Ka innhnen pawl in in hnihsan. I theitu pawl cun in ṭih; Lamzin ih in hmuh tikah an tlanhlo.

¹²Zohman in in thei nawn lo; mithi tluk ah in ruat. Beelkuai hlonmi vek ka si.

¹³Ka ral pawl thuthup an sim-aw ka thei. Ka kiangkap cu phannak in a khat. Keimah phiarnak khua an khang; A thah in tum a si.

¹⁴Sikhalsehla maw BAWIPA, Ka rinsanmi cu nangmah na si; Nangmah cu ka Pathian na si.

¹⁵Ka ziangzongza na kut ah a um. Ka ral pawl le i hremtu pawl kut in i hum hram aw.

¹⁶Kei cu na siahhlawh ka si, Zaangfahnak thawn i zoh hram aw. A hmunmi na duhdawtnak in i run aw.

¹⁷Maw BAWIPA, nangmah ka lo ko; Ningzahnak ah i thlengter hram hlah aw. Mi ṭha lo pawl cu an ningzak ko seh; Mithi khua ah ṭong ding nei loin um hai seh.

¹⁸Mihngal le mi puarthau pawl, Hmuhsuamnak thawn miṭha pawl ih thu a reltu pawl, Thuphan an simnak kaa cu phit hram aw.

¹⁹Nangmah a lo ṭihzahtu pawl hrangih na khawl ciami thil ṭha a tam zia cu! Nangmah a lo ringtu pawl na humnak thu mi hmuahhmuah mithmuh ih a mawizia cu!

²⁰Na thladem hnuai ah himte in na ret hai, Mi phiarnak ihsin an luat. Na puuk sungah hnangamte in na thup hai, An ral pawl ih hmuhsuamnak in an luat a si.

²¹BAWIPA cu thangṭhat siseh. In kulh ih ka van a san laiah I duhdawtnak na langter zia cu mangbangza a si!

²²Ka thin a phang ih ka lung in: ‘A umnak ihsin i hlon zo a sihi!’ tiah ka ruat. Asinain bomnak dilih ka lo kawh tikah ka aunak aw i thei thotho.

²³Maw mithiang pawl, BAWIPA cu duhdaw uh; Amah rinsantu cu BAWIPA in a hum ih mi hngal pawl cu nasa zetin a tuah hai a si.

²⁴BAWIPA ah ruahsannak a neitu pawl cu cak le ral ṭha in um uh.