Read Falam Chin SAAM HLABU 32 Bible Online

SAAM HLABU 32 - Falam Chin bible

SAAM HLABU 32

¹[27] A mawhnak ngaithiam a si mi le, A sualnak thlahsak a si mi cu mi thlawsuak a si.

²BAWIPA in sual a puh lomi le, A lung sungah mibumnak a neilotu cu mi thlawsuak a si.

³Ka sualnak phuang loih ka um tikah cun, Sunvu ka ṭahnak ah ka taksa a vuai ṭheh.

⁴Maw BAWIPA, a sun a zan in na kut in i nen; Ka thazaang cu, ṭhal ni ling ih daitla a roter bangin, a roter ṭheh a si.

⁵Cule na hnenah ka sualnak cu ka phuang; Ka thil tisual mi pakhat hman ka pheh lo. Ka sualnak cu na hnenih phuang dingin ka ruat cat; Cule nangmah in ka sualnak cu i ngaithiam ṭheh a si.

⁶Nangmah a lo tlaihsantu hmuahhmuah in, An harsat caan ah na hnenah thla cam hai seh. Tilik lianpi a thlen tikah an hnen a thleng lo ding.

⁷Nangmah cu ka beunak hmun na si. Harnak in i hum ding. Nangmah ih i run ruangah I runnak cu hla in ka sak ding.

⁸BAWIPA in, “Na thlun dingmi lamzin ka lo sim ding. Ka lo zirh dingih ka lo hmuh ding.

⁹Rang le laak vek cun aa hlah; Na thu ngaitu si dingah annih cu Kakharh le hmurhri in dirh an ṭul,” a ti.

¹⁰Mi ṭha lo pawl ih tuarmi cu a tam ngaingai; Asinain BAWIPA a rinsantu cu A hmunmi a duhdawtnak in a hum hai a si.

¹¹Nannih miding pawl, BAWIPA ah lungawi aipuang in um uh. Nannih thinlung ṭha pawl, nuamzet in au uh.