Read Falam Chin SAAM HLABU 33 Bible Online

SAAM HLABU 33 - Falam Chin bible

SAAM HLABU 33

¹Nannih miding pawl, BAWIPA ih thil tuahmi ruangah nan lungawi uh. Nannih a thu thluntu pawl, Amah thangṭhat uh.

²BAWIPA ih hnenah ṭingṭang thawn lungawinak thu sim uh. Hri pahra nei tingrisit thawn a hnenah hla sak uh.

³A hnenah hla thar sak uh. Mawi zetin tingrisit tum uhla ring zetin hla sak uh.

⁴BAWIPA ih thu cu a dik; A tuahmi hmuahhmuah cu rintlak an si.

⁵BAWIPA in dingnak le thudik a duh; A duhdawtnak in leilung hi a khat.

⁶BAWIPA in vanih ummi hmuahhmuah a thu in a seemsuah. A ṭong in ni, thlapi le arsi pawl a tuah.

⁷Tifinriat tidai pawl cu rial tithawl sungih tidai thun vekin hmunkhat ah a finkhawm; Tipithuanthum tithukpi pawl cu A thilri retnak khaan sungah a khum.

⁸Leilung pumpi in BAWIPA cu ṭih seh. Leilungtlun mi hmuahhmuah in BAWIPA cu ṭihzah cio hai seh.

⁹A ṭong tikah leilung cu seemsuah a si ih, A thupeknak in ziang hmuahhmuah a suak a si.

¹⁰BAWIPA in leitlun miphun pawl ih tumtahmi cu a phelhsolh. An tawlrelmi tuahsuak lo dingah a kham hai.

¹¹Asinain amah ih tumtahmi cu kumkhua in a hmun ih, A tawlrelmi pawl cu sanikhuk a hnget.

¹²BAWIPA kha an Pathian ah a neitu miphun cu, mi thlawsuak phun an si. BAWIPA in a rothil ah a hrilmi pawl cu mi thlawsuak an si.

¹³BAWIPA cun vancung ihsin a run zoh ih, Miphun hmuahhmuah a hmu.

¹⁴A lalnak hmun ihsin leilung ih a ummi hmuahhmuah a run zoh.

¹⁵Amah cu an ruahnak hmuahhmuah a sersiamtu le, An tuahnak hmuahhmuah a theitu a si.

¹⁶Siangpahrang in ral a neh tikah A ralkap bu an cahzet ruangah a si lo. Ralkap khal in ral a neh tikah Amah ih tha a cah ruangah a si lo.

¹⁷Raldonak rang pawl cu ral nehnak ngaingai ahcun, Santlai lo an si. An cahzet hmanah zohman an run thei lo.

¹⁸BAWIPA in amah ṭihzahtu le A hmunmi a duhdawtnak a ringtu cu A kilveng ringring a si.

¹⁹Thihnak ihsin a run hai ih Paampi a tlun tik khalah an nunnak a hum a si.

²⁰BAWIPA ih hnenah ruahsannak kan nei. Amah cu in bawmtu le in humtu a si.

²¹Amah ih ruangah kan lung a awi. A hmin thianghlim kan ring a si.

²²Maw BAWIPA, na hnenih ruah saannak kan neih bangin, A hmunmi na duhdawtnak cu Kan hnenah um hram seh.