Read Falam Chin SAAM HLABU 34 Bible Online

SAAM HLABU 34 - Falam Chin bible

SAAM HLABU 34

¹[28] BAWIPA ih parah ka lung a awi ringring ding. Amah thangṭhat cu ka bang dah lo ding.

²A thil tuahmi ruangah amah cu ka thangṭhat ding. Rethei zonzai pawl in thei uhla nan lungawi uh.

³BAWIPA ih maksak zia cu in cawimawi pi uhla, Amah ih hmin cu thangṭhat tlang uhsi.

⁴BAWIPA hnenah thla ka cam ih amah in i let. Ka ṭihphannak hmuahhmuah sungin i luatter.

⁵Mi zonzai pawl in amah cu an zoh ih an lung a awi. Ziangtik hmanah an ning a zak nawn lo ding.

⁶Bawmtu nei lo pawl in amah an ko ih a sawn hai. An harsatnak hmuahhmuah in a luatter hai.

⁷BAWIPA a ṭihzahtu pawl cu a vancungmi in an kil ih, ṭihphannak in a run hai a si.

⁸BAWIPA ih ṭhatzia cu nanmah tein tep ciar hnik uh; A hnenih himnak a ngahtu cu mi thlawsuak an si.

⁹Maw amah ih minung pawl, BAWIPA cu ṭihzah uh. Amah a ṭihzahtu cu tlaksammi zianghman an nei lo.

¹⁰Kiosa hman rilrawng in an um ṭheu; Sikhalsehla BAWIPA ih duhnak a thluntu cu, Thil ṭha an hlawhsam dah lo.

¹¹Ra uh, mino pawl, i ra ngai hnik uh. BAWIPA ṭihzah daan ka lo zirh hai ding.

¹²Leilung tlunah hin nuam zetih nun nan duh maw? Nun sau le lungawi nan duh maw?

¹³Nan duh asile a ṭha lomi ṭong lo dingah le Thuphan sim lo dingah ralring uh.

¹⁴Thil ṭha lo cu hrial uhla a ṭhami tuah uh. Daihnak tumtah uhla a cangthei tawkin ngah zuam uh.

¹⁵BAWIPA in miding pawl cu a zoh ringring hai ih an aunak khal a thei.

¹⁶Asinain mi ṭha lo pawl cu a dodal hai a si. An thih tikah an hmin hngilh tata dingah a phiatfai a si.

¹⁷Miding pawl in BAWIPA cu an ko ih an aw a thei; An harsatnak hmuahhmuah sungin a luatter hai.

¹⁸BAWIPA in thinnau mi pawl cu a naih hai ih, Beiseinak zianghman a nei nawn lotu pawl cu a run hai a si.

¹⁹Mi ṭha khal harnak tampi a tuar ṭheu; Asinain BAWIPA in cu hmuahhmuah sung khal in a suah ṭheu.

²⁰BAWIPA in ṭhazet in a kil, A ruh pakhatte hman a kiak lo.

²¹Mi ṭha lo cu ṭhatlonak in a that ding; Miding a huatu pawl cu hremnak an tong ding.

²²BAWIPA in a siahhlawh pawl cu a tlen hai ding; Beunak duh ah a hnenih a fehtu cu, an him ding.