Read Falam Chin SAAM HLABU 35 Bible Online

SAAM HLABU 35 - Falam Chin bible

SAAM HLABU 35

¹[29] Maw BAWIPA, i ralsantu pawl ralsan ve awla, I dotu pawl do ve aw.

²Na ralphaw le na raldonak thuam la awla, Keimah bawm dingah pok aw.

³Na feipi le na hriamhrei la awla, I dawitu pawl cu kham hai aw. Cule, “Nangmah Runtu ka si,” tiah i tiam hram aw.

⁴Keimah thah i tumtu pawl cu Sung hai sehla ningzak in um hai seh; Keimah siatsuah ding ih i phiartu pawl cu, Thinnau le thinlung hnok in kir hai seh.

⁵BAWIPA ih vancungmi in a dawi hai tikah, Thli ih a semhlomi fanghi vek si hai seh.

⁶BAWIPA ih vancungmi in a vuak hai tikah, An lamzin thim sehla naalzet seh.

⁷Ziangthu hman um loin keimah kai dingah, Thang in kam ih khur thuk an lai.

⁸Asinain an theih hlanah siatsuahnak in a man ding; Anmah ih kam ciami thang in a awk hai ding ih, Siatsuahnak sungah an tla ding.

⁹Cule BAWIPA ah ka lung a awi ding; I hum ruangah ka ai a puang ding.

¹⁰BAWIPA ih hnenah ka thinlung zatein, “Nangmah bangtuk zohman an um lo; Mi ṭawnṭai pawl cu mi cak pawl kut ihsin na humhim ih, Mi farah zonzai pawl cu Hmuhsuamtu pawl ih kut ihsin na humhim hai a si,” ka ti ding.

¹¹Mi ṭha lo pawl ka sual hawltu ah an suak ih, Ka theih dah lomi sual in puh ciamco.

¹²Ṭhatnak cu siatnak in in lehrul ih, Thinnau le riahsia in ka um.

¹³An dam lo tikah riahsia in buri hnipuan ka hruk ih, An hrangah rawl ka ul. An hrangah lu kun in thla ka cam,

¹⁴Ka rualpi le ka unau hrangih riahsia bangin. Mi pakhatkhat a nu ih zuun a ngai bangin, An hrangah riahsia in ka kuun ih ka feh.

¹⁵Asinain harsatnak ka ton tikah, Annih pawl cu an lung a awi; Keimah hnihsan dingah in kulh, Tluangmi pawl khal in in vua, Cat loin in vaw ringring.

¹⁶Ke-awl an hmuhsuam ih an puahcok bangin, In hua ih in mitkem ciamco.

¹⁷BAWIPA, ziangtik tiangso hiti in i zoh meen ding? Hitiih in vuaknak ihsin i run hram awla, Ka nunnak cu hi kiosa pawl kut sungin i hum hram aw.

¹⁸Cuticun a pumkhawmmi na minung lakah ka lo lawm ding, An zate hmaiah ka lo thangṭhat ding.

¹⁹Thuphanpertu ka ral pawl cu kham hai aw, Ka sun ruangah diriam in um hlah hai seh; Thuhla um loin i huatu pawl cu kham hai aw, Ka riahsiat ruangah an lungawi in hni suamso hlah hai seh.

²⁰Rualpi ṭha ṭong in an ṭong lo, Rualremnak a duhtu pawl kha thuphan a phunphun an puh hai.

²¹Sual in puh ih, “Na tuahmi kan thei,” tiah an au.

²²Asinain BAWIPA nang in hi thil hi na hmu thluh; Curuangah Bawipa daitein um hram hlah aw; Lamhla ah i umsan hram hlah aw.

²³Tho awla Bawipa i hum aw; Ding awla ka Pathian ka thu i simsak aw.

²⁴Maw BAWIPA, nang cu a dingmi na si; Curuangah sual nei lo a si tiah i phuan sak aw. Ka ral pawl cu hni suamso in umter hlah hai aw.

²⁵“Kan dawihlo zo, kan duh mite kan tuah ngah zo,” an ti lonak dingah nangmah in kham hai aw.

²⁶Hi tluk ka tuarnak parih a hni sursotu pawl cu, Ningzak le buai in um hai seh. “Anih hnakin kan ṭha deuh,” i titu pawl cu, Mualpho le thangsia in um hai seh.

²⁷Keimah thiamcotermi ka si ding, i duhsaktu cu lungawi aipuang in um hai sehla, “BAWIPA cu a maksak a si; A siahhlawh hlawhtlinnak a ngah ruangah a lung a awi a si,” tiah cat loin au hai seh.

²⁸Cuticun na dingnak cu ka than ding ih, Sun nihlawh in ka lo thangṭhat ding.