Read Falam Chin SAAM HLABU 36 Bible Online

SAAM HLABU 36 - Falam Chin bible

SAAM HLABU 36

¹[30] Sualnak in mi ṭha lo ih thinlung sungah thu a vun sim; Cutiin Pathian an hnong ih malte hman Pathian ṭihnak an nei lo.

²Anmah le anmah an porh awk tuk ruangah an sualnak an hmu thei loih an hua thei fawn lo.

³An kaa ih a suakmi cu sualnak le thuphan hlir an si. Ṭhatnak zianghman tuah dingah fimnak an nei nawn lo.

⁴A ihkhun ih a zau phah ah thilṭha lo a ngaihtuah; Theinacing in zinsia a zawh; Ziangbangtuk sualnak hman hrial mi a nei lo.

⁵Maw BAWIPA, a hmunmi na duhdawtnak vancung a thleng ih, Rintlak na sinak in van khi a dai a si.

⁶Na dingfelnak cu tlang saangpi bangtuk in a saang ih, Na dingthluk lairelnak cu tipi thuanthum bangtuk in a thuk. Maw BAWIPA, nang cun minung siseh ramsa siseh na zaangfah hai a si.

⁷Maw Pathian, a hmunmi na mi duhdawtnak cu a va sunglawi ve! Mi in na thladem ah humhimnak an ngah.

⁸Na inn sungih ei cawk lo rawl cu an ei-ih, Na lungawinak tiva ihsin tidai na pek hai.

⁹Ziangahtile na hnenah nunnak cerhti a um; Na tleunak sungah tleunak kan hmu.

¹⁰Nangmah a lo theitu hnenah, Na duhdawtnak cat loin um sehla, Thinlung a dingmi hnenah, Na ṭhatnak cat loin um hram seh.

¹¹Mihngal pawl cun i siim hram hlah hai seh; Mi ṭha lo pawl cun i tlanter hram hlah hai seh.

¹²Mi ṭha lo pawl an tlaknak khi zohhnik! Khi tawkah an ril ih an thosal thei nawn lo.