Read Falam Chin SAAM HLABU 37 Bible Online

SAAM HLABU 37 - Falam Chin bible

SAAM HLABU 37

¹[31] Mi ṭha lo an um ruangah donhar in um hlah. Sualnak a tuahtu pawl khal va daw hlah.

²Annih cu hrampi ro bangin an hlo ding ih, Hramkung vuai bangin an thita ding.

³BAWIPA cu rinsan awla thil ṭha tuah aw. Cuticun hi ram sungah himdamte in na um ding.

⁴BAWIPA ah na lungawinak hawl awla, Na lungthlitum a lo pe ding.

⁵BAWIPA hnenah na nunnak pe aw; Amah rinsan awla a lo bawm ding.

⁶Na ṭhatnak cu sun khawvang bangin a vangter ding ih, Na dingnak cu sun nitleu bangin a tleuter ding.

⁷BAWIPA ih hmaiah daiteón um aw, Amah ih cangvaihnak cu thinsau in hngak aw; Mi neinung an um ruangah ninghang in um hlah; Mi ṭha lo pawl khawkhannak an hlawhtlin ruangah thin ṭeu in um hlah.

⁸Na thinheng hlah! Na ai khal thok hlah! Na don tla har hlah! Thil ṭha lo a suahter a si.

⁹BAWIPA a rinsantu cu hi ram sungah hnangamte in an um ding. Asinain mi ṭha lo pawl cu dawihlo an si ding.

¹⁰Reilote-ah mi ṭha lo pawl cu an hlo ding. Na hawl khalle na hmu nawn lo ding a si.

¹¹Sikhalsehla lungnem pawl cun, Ram cu an luah ding. Daihnak le neihnunnak an co ding.

¹²Mi ṭha loin mi ṭha an phiar, An hacang an rial ih huatnak mit in a zoh.

¹³BAWIPA in mi ṭha lo cu a hnihsan; An cem cing ding ti a theih ruangah.

¹⁴Mi ṭha lo cun an ralnam an zuuk ih an li an nawp; Mi farah le zonzai thah an tum. Mi ṭha le mi fel thah ṭheh an tum a si.

¹⁵Sikhalsehla anmah ih zuh mi ralnam in a dawt hai ding ih, An li pawl cu khiah ṭheh an si ding.

¹⁶Mi ṭha lo pawl ih neihmi thil tampi liangluang hnakin, Mi tha pawl ih neihmi thil malte man a nei sawn.

¹⁷Ziangahtile BAWIPA in, Mi ṭha lo ih thazaang cahnak cu a khiak ding ih, Mi ṭha pawl cu a humhim ding.

¹⁸BAWIPA in amah ih thu a thluntu pawl cu a kilkhawi hai; Hi ram cu kumkhua in anmah ih ta a si ding.

¹⁹Harsat caanah mual an pho lo ding; Paam caan khalah ei khop an ngah ringring ding.

²⁰Asinain mi ṭha lo pawl cu an hloral ding; BAWIPA a raltu pawl cu hramlak pangpar bangin an ziam ding, Meikhu bangin an hlota ding.

²¹Mi ṭha lo cun mi thil an cawi ih an sam sal nawn lo; Asinain mi ṭha cun mi a zaangfah ih a tirh a siang.

²²BAWIPA ih thlawsuahmi pawl in hi ram hi an co ding; Asinain a camsiatmi pawl cu dawihlo an si ding.

²³Minung ih fehnak lamzin cu BAWIPA in a sial sak ih An nuncan parah a lung a awi.

²⁴A bah hmanah a rilta lo ding, Ziangahtile BAWIPA in a tho saal ding.

²⁵Ka seenlai ihsin ka tar tiang, BAWIPA in mi ṭha a tlansan ka hmu dah lo. An faale pawl khal rawl diltu an si ka hmu dah lo.

²⁶Ziangtik khalah siang zetin mi a pe ih mi a coih, A faale pawl cu thlawsuah ah an cang.

²⁷Siatnak cu tlansan awla ṭhatnak tuah aw; Cutin hi ram sungah kumkhua in na um ding.

²⁸Ziangahtile BAWIPA cun a dikmi a duh ih, Amah rinsantu pawl cu a dungtun hai lo a si. Annih cu kumkhua in a hum hai. Asinain mi ṭha lo ih tefa pawl cu dawihlo an si ding.

²⁹Miding pawl in hi ram cu an luah ding ih, Hnangamtein kumkhua in an um ding.

³⁰Mi ṭha pawl ih kaa in fimnak a suak; An lei in dingnak a sim.

³¹Pathian ih daan cu a thinlung sungah a ret ih, Ziangtik hmanah a pialsan dah lo.

³²Mi ṭha lo in mi ṭha cu a zoh thup ringring ih thah a tum.

³³Asinain BAWIPA in a ral ih kut sungah a taanta lo ding ih, A thu an rel tik khalah a hnongta lo ding.

³⁴Nan ruahsannak cu BAWIPA ih hnenah ret uhla, A thupekmi pawl thlun uh. Hi ram co theinak thazaang a lo pe hai ding. Cule mi ṭha lo pawl siatsuah thluh an si cu na hmu ding.

³⁵Mi ṭha lo pakhat thu neizet le porh-aw zettu ka hmu zo; Lebanon sidar thingkung bangin midang hnakih saang deuh ah a ret aw.

³⁶Asinain nehhnu ih ka zoh sal tikah a um nawn lo. Ka hawl khalle ka hmu nawn lo.

³⁷Mi ṭha cu zohhnik uh, Mi ding cu thlir hnik uh; Mi lungnem le midai cun te le fa an nei.

³⁸Asinain mi ṭha lo pawl cu an hloral ṭheh, An tefa pawl cu an cimit ṭheh a si.

³⁹Mi ding pawl ih runnak cu BAWIPA hnen in a ra. Harsatnak caan ah an beunak lungpi a si.

⁴⁰BAWIPA in annih cu a bawm ih a run; A hnenah beunak duh ih an feh ruangah, Mi ṭha lo kut ihsin a hum hai a si.