Read Falam Chin SAAM HLABU 38 Bible Online

SAAM HLABU 38 - Falam Chin bible

SAAM HLABU 38

¹[32] Maw BAWIPA, na thinheng in i kawk hram hlah aw. Na thin-aithok in i hrem hram hlah aw.

²Na conkiang in i tuahmawh zo; Ril ko in i vuak zo.

³Na thin a heng ruangah besia zetin ka na; Ka sualnak ruangah ka ruangpi cu natnak in a khat.

⁴Ka sualnak tilian sungah ka pil; I delh tuk ih ka phur thei lo.

⁵Ka aat ruangah ka hma pawl cu Hnai an khuar ih an thu, an nam ngaingai.

⁶Ka eel a kuun ih ka bokta. Sun nihlawh in ka ai, ka hruum.

⁷Ka tak a sa ih ka khur ciamco; Ka besia ih ka thi zik thlang.

⁸Ka tha a cemthla ih ka bei a dong ngaingai. Ka thinhar in ka hui ka ai rero.

⁹Maw BAWIPA, ka thinlung duh mi cu na hmu, Ka hruumnak khal na thei.

¹⁰Ka lung a hnin ih tha ka nei nawn lo. Ka mit khal khua a hmu nawn lo.

¹¹Hma tampi ka neih ruangah ka rualpi le, Kan innhnen pawl in in hrial; Keimah ih innsung saang hman hlimphirte in an um.

¹²Thah i duhtu pawl in thang in kam. Tuahmawh i duhtu pawl in siatsuah dingah in hro. Sun nihlawh in keimah phiarnak an tawlrel.

¹³Hnaset ka bang, zianghman ka thei thei lo. Dangpit ka bang, zianghman ka ṭong thei lo.

¹⁴Mi ṭong a theih thei lo ruangah, Mi thusuh a let thei lomi ka bang.

¹⁵Maw BAWIPA, nangmah ka lo hngak; Bawipa ka Pathian, nangmah in i sawn hram aw.

¹⁶Harsatnak ka ton ruangah ka ral in in direm hlah hai seh; Ka bah ruangah porh-aw hlah hai seh.

¹⁷Ka bah zik ringring ih Cat loin harsatnak ka tuar.

¹⁸Ka sualnak ka phuang, Ka thinlung donharnak in a khat.

¹⁹Ka ral pawl cu an harhdam zetih an cakzet fawn. Ziangthu hman um lo ih i huatu an tamzet fawn.

²⁰A dikmi tuah ka tum ruangah Keimah i duh lotu pawl cun ṭhatnak cu siatnak in in lehrul a si.

²¹Maw BAWIPA, i dungtun hram hlah aw; Maw ka Pathian, a hlatnak ah i umsan hram hlah aw.

²²Maw BAWIPA, i Runtu, atu-ah zamrangin i ra bawm hram aw.