Read Falam Chin SAAM HLABU 39 Bible Online

SAAM HLABU 39 - Falam Chin bible

SAAM HLABU 39

¹[33] “Ka thil tuahmi ka ralring pei, Ka lei in i sualter hlah seh; Ka ral pawl ka kiangkap ih an um sungah cun, ṭong lotein ka hmur ka ciip ding,” tiah ka ti.

²Daiziar in ka um ih kam khat hman ka ṭong lo; Thil ṭha thu hman rel lotein ka um. Asinain ka harsat tuarnak cu a zual deuhdeuh ih,

³Ka thinlung donharnak in a khat. Ka ruat tam deuhdeuh, ka thin a ling deuhdeuh. Curuangah Pathian hnenah:

⁴“Maw BAWIPA, ziangtik tiangso hiti in ka nun ding? Ka thi mai sawn lo ding maw? Tuan ah ka nunnak hi a cem ko lo ding maw? I theihter hram aw!” tiah sut loin ka um thei lo.

⁵Ka nunnak hi na va tawiter tuk lawmmam so! Na hmaiah ka nun caan tawite hi ziangti tham a si lo. Minung nunnak cu kan thaw ih kan thawt mi thli lawng hi a si.

⁶Kan phenthlam tluk fang a rak si. A ṭuanmi hmuahhmuah cu thu lolak hlir ah an cang. Ro a khawl vivo naón a cotu ding ngaingai a thei lo.

⁷Cuti asile maw BAWIPA, ziangso beisei ding ka neih? Ka ruahsanmi cu nangmah lawng na si.

⁸Ka sualnak hmuahhmuah sungin i luatter awla, Mi aa pawl ih hnihsuahsainak ah i cangter hram hlah aw.

⁹Hi tluk harsatnak tuar dingih i tuah ruangah, Daite in ka um ding; Kam khat hman ka ṭong lo ding.

¹⁰I hrem nawn hlah aw. I vuak ruangah ka thi zik thlang.

¹¹Minung sualnak cu kawknak thawn na lehrul, A sunsakmi thil hmuahhmuah cu, sunhrul bangin na siatsuah ṭheh a si. Asi, minung cu kan thawtmi thaw vek fang a si.

¹²Maw BAWIPA, ka thlacamnak i thei hram awla, Ka lo dilmi hi i ngaisak hram aw. Na hnenih ka ṭah tikah daitein i um san men hlah aw. Ka pu le ka pa pawl vekin kei hi caan tawite sung lawng na mikhual ka si.

¹³Hi leilung hi ka fehsan ih ka um nawn lo tikcu caan a thlen deuh hlan ahhin lungawi hnadai ih ka um theinak dingah khatlam i hoisan hram aw.