Read Falam Chin SAAM HLABU 40 Bible Online

SAAM HLABU 40 - Falam Chin bible

SAAM HLABU 40

¹[34] BAWIPA ih bomnak cu thinsau in ka hngak ringring, Cule i run ngai ih ka aunak a thei.

²Ṭihnungza khur thukpi sungin i dir suak; Ciarbeek duuppi in a khatmi kua sung ihsin, Lungto parah himte in i dinter ih Hnangamtein i ret.

³Hla thar sak ding i zirh, Kan Pathian faknak hla cu; Hi ka tonmi thil hi mi tampi in an hmuh tikah, An ṭih ding ih BAWIPA cu an rinsan ding.

⁴Khawzing pawl biaknak ih a tel lotu le mi puarthau a kom lo ih BAWIPA sawn a rinsantu cu mi thlawsuak an si.

⁵Maw BAWIPA kan Pathian, Kan hrang thil tampi na tuah zo. Nangmah bangtuk zohman an um lo. Kan hrangah mangbangza tumtah mi na nei; A zate in sim le phuan ṭheh tum sehla, ka sim cawk dah lo ding.

⁶Raithawinak le thawhlawm pekmi pawl hi na duhmi an si lo. Biakṭheng parih ṭilva mei-ur thawinak pek khal na dilmi a si lo. Sualthlah thawinak pek khal na lungawimi a si lo. Cu ai-ah na thu theih theinak ah hna i pek ih,

⁷Na hnenah, “Hinah ka um. Ka hrangih na retmi na cazual sungah ka thuhla ngan in a um.

⁸Maw ka Pathian, na duhnak thlun cu ziang tlukin so ka duh! Na thupekmi cu ka thinlung sungah ka ret,” tiah ka lo ti.

⁹Maw BAWIPA, na minung pawl an pumkhawmnak hmun ah, In runnak thuthangṭha ka sim. Cuih thusim cu ka cawl dah lo ding, ti cu na thei ko.

¹⁰Na runnak thuthang cu keimah hnen lawngah ka ret lo. Rintlak na sinak le in bomnak thu cu ka sim ringring a si. A hmunmi na duhdawtnak le na felnak cu, Na minung pawl an tonkhawmnak hmunah daiteón ka umpi meen lo.

¹¹Maw BAWIPA, ka parih zaangfahnak na neihmi cu cemter hram hlah aw. Na duhdawtnak le in tlaihsannak cun in humhim ringring ding.

¹²Harsatnak tampi in i kulh, siarcawk khal an si lo. Ka sualnak in i kai ngah, khua khal ka hmu thei lo. Ka lu parih sam hnakin an tam deuh ih ka thin a phang zo.

¹³Maw BAWIPA, i run awla zamrang in i bawm hram aw.

¹⁴Keimah thah i tumtu pawl cu Ningzak le thinlung aa in um hai seh. Harsatnak ka ton ruangih lungawitu pawl cu, Dungah kirsal hai sehla mualpho in um hai seh.

¹⁵Hnihsuahsainak ih i hmangtu pawl cu, An sun ruangah ningzak in um hai seh.

¹⁶Na hnenih a rami pawl cu Lungawi le thinnuam in um hai seh. Na rundamnak a sunloihtu pawl cun, “BAWIPA ih maksak zia cu!” ti ringring hai seh.

¹⁷Maw BAWIPA, kei cu mi rethei le mi tlasam ka si; Asinain nang cun i ruatzet. Nang cu i bawmtu le i Runtu na si; Maw Pathian, i ra bawm zaang aw.